Ўзбекистонда 2025 йилдан бошлаб сертификатга эга бўлмаган мутахассисларга кўп квартирали уйларнинг бошқариш органларига раҳбарлик қилиш тақиқланади. Бу ҳақда Қурилиш ва уй-жой коммунал хўжалиги вазирлиги ахборот хизмати раҳбари Саидносир Усмонов маълум қилди.
Унинг билдиришича, Вазирлар Маҳкамасининг 2023 йил 11 сентябрда қабул қилинган “Шаҳарсозлик ва уй-жой коммунал хўжалиги соҳалари мутахассисларини сертификатлаш тизимини жорий этиш тўғрисида”ги қарори билан 2023 йил 1-октябрдан бошлаб, буюртмачи хизматларининг лойиҳа бошқаруви ва техник назорат мутахассислари, лойиҳа ташкилотларининг муаллифлик назорати мутахассислари, лойиҳа бош муҳандислари ва бош архитекторлари, пудрат ташкилотларининг ички назорат мутахассисларини ўқитиш ва сертификатлаш йўлга қўйилади.
Кейинги йилдан бошлаб эса, экспертиза органлари экспертлари, назорат ўлчови мутахассислари, кўп квартирали уйларни бошқариш органлари раҳбарлари, вилоят ва туман (шаҳар) архитекторлари ҳамда ҳудудий назорат инспекциялари инспекторлари малакасини ошириш ва сертификатлаш тизими жорий этилади.
Шунингдек, шаҳарсозлик ва уй-жой коммунал хўжалиги соҳаларида мутахассисларни сертификатлаш тартиби тўғрисидаги низом тасдиқланди.
Хусусан, бунда соҳа мутахассисларига сертификат бериш, тест синови жараёнини ўтказиш, сертификат берилган мутахассислар реестрини юритиш ва сертификатнинг амал қилишини тўхтатиш тартиблари белгиланган.
Янгича тартибга кўра:
- соҳа мутахассисларини ўқитиш ва сертификатлаш жараёнларини ташкил этиш Қурилиш ва уй-жой коммунал хўжалиги вазирлиги ҳузуридаги Компетенсияни ривожлантириш институти томонидан тегишли дастурлар асосида ташкил этилади;
- сертификатлар тегишли дастурлар бўйича ўқув курсини тугатиб, Билим ва малакаларни баҳолаш агентлиги томонидан ўтказиладиган тест синовларини муваффақиятли якунлаган мутахассисларга берилади;
- мутахассис тест синовидан муваффақиятли ўткандан сўнг “Шаффоф қурилиш” миллий ахборот тизимидан QR-код қўйилган сертификат юклаб олинади.
2025 йилдан бошлаб сертификатга эга бўлмаган мутахассисларга юқори тоифали қурилиш объектлари бўйича шаҳарсозлик фаолияти билан шуғулланиш, шунингдек, кўп квартирали уйларнинг бошқариш органларига раҳбарлик қилиш тақиқланди.
Изоҳ (0)