O‘zbekistonda 2023-yil 1-dekabrgacha barcha ko‘p kvartirali uylardagi mavjud liftlar xatlovdan o‘tkazilib, aniqlangan kamchiliklar bartaraf etilishi taʼminlanadi. Bu haqda Vazirlar Mahkamasining “Sanoat elektrotexnika mahsulotlaridan foydalanishda aholi xavfsizligini ta’minlash hamda ushbu mahsulotlar ustidan sifat nazoratini kuchaytirish yuzasidan qo‘shimcha chora-tadbirlar to‘g‘risida”gi qarori loyihasida ko‘zda tutilgan.
Hujjatda qayd etilishicha, aholining ko‘p kvartirali uylarda yashashi uchun qulay va xavfsiz shart-sharoitlar yaratish, liftlarning texnik holatini tubdan yaxshilash, avariya holatlarining oldini olish va aholiga sifatli xizmat ko‘rsatilishini taʼminlash maqsadida bir qator choralar ko‘riladi.
Xususan, respublikada ishlab chiqarilayotgan va import qilinayotgan liftlarning davlat standartlariga va xavfsizlik talablariga muvofiqligi o‘rganilib, ko‘p kvartirali uylar, aholi gavjum bo‘ladigan obyektlarda ularning o‘rnatilishini nazoratga olish tizimi takomillashtiriladi.
2023-yil 1-dekabrdan boshlab ko‘p kvartirali uylar, shuningdek, lift o‘rnatilishi nazarda tutiladigan barcha obyektlardagi liftlarni foydalanishga qabul qilishdan oldin ularni majburiy tartibda dispetcherlik xizmatiga ulash talab etiladi.
2024-yil 1-yanvardan boshlab davlat budjeti mablag‘lari hisobidan moliyalashtiriladigan qurilish (rekonstruksiya) obyektlarini loyihalashtirishda ustuvor ravishda respublikada ishlab chiqariladigan liftlar qo‘llanilishi talab etiladi.
Tog‘-kon, geologiya va sanoat xavfsizligini nazorat qilish inspeksiyasi va Texnik tartibga solish agentligi respublikaga import qilinadigan liftlarning texnik jihatdan tartibga solish sohasidagi normativ hujjatlar talablariga muvofiq laboratoriyalarda sinovdan o‘tkazilishi va ularga muvofiqlik sertifikati rasmiylashtirilishini nazorat qiladi.
Qurilish va uy-joy kommunal xo‘jaligi vazirligi Qoraqalpog‘iston Vazirlar Kengashi, viloyatlar va Toshkent shahar hokimliklari bilan birgalikda 2024-yil 1-yanvargacha respublikaning barcha hududlarida ko‘p kvartirali uylarni boshqarish organlari huzurida liftlarni monitoring qilish bo‘yicha dispetcherlik xizmatlari ko‘rsatilishini tashkil etib, doimiy faoliyat yuritishini taʼminlaydi.
Tog‘-kon, geologiya va sanoat xavfsizligini nazorat qilish inspeksiyasi manfaatdor vazirlik va idoralar bilan birgalikda ko‘p kvartirali uylar, shuningdek, lift o‘rnatilishi nazarda tutiladigan barcha obyektlardagi liftlarni foydalanishga qabul qilishdan oldin ularni majburiy tartibda dispetcherlik xizmatiga ulash bo‘yicha talablar bajarilishi yuzasidan doimiy nazorat o‘rnatadi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Qurilish va uy-joy kommunal xo‘jaligi vazirligi, Favqulodda vaziyatlar vazirligi, Tog‘-kon, geologiya va sanoat xavfsizligini nazorat qilish inspeksiyasi bilan birgalikda 2023-yil 1-dekabrgacha barcha ko‘p kvartirali uylardagi mavjud liftlarni xatlovdan o‘tkazib, aniqlangan kamchiliklar bartaraf etilishini taʼminlaydi.
Qurilish va uy-joy kommunal xo‘jaligi vazirligi xatlov yakunlari bo‘yicha amalga oshirilgan ishlar yuzasidan 2023-yil 10-dekabrgacha Vazirlar Mahkamasiga umumlashtirilgan hisobot kiritadi.
Qurilish va uy-joy kommunal xo‘jaligi vazirligi, Tog‘-kon, geologiya va sanoat xavfsizligini nazorat qilish inspeksiyasi, Favqulodda vaziyatlar vazirligi bilan birgalikda respublikadagi barcha toifadagi liftlarni har yili kamida bir marotaba majburiy texnik ko‘rikdan o‘tkazadi.
Qurilish va uy-joy kommunal xo‘jaligi vazirligi Raqamli texnologiyalar vazirligi bilan birgalikda 2024-yil 1-yanvargacha lift uskunalarining texnik holatini monitoring qilish, avariya holatlarini real vaqt rejimida qayd etuvchi zamonaviy elektron dastur hamda ko‘p kvartirali uylarda ekspluatatsiya qilinayotgan liftlarning reyestri joriy etilishini taʼminlaydi.
Tog‘-kon sanoati va geologiya vazirligi, Qurilish va uy-joy kommunal xo‘jaligi vazirligi Qoraqalpog‘iston Vazirlar Kengashi, viloyatlar va Toshkent shahar hokimliklari bilan birgalikda ikki oy muddatda liftlardan foydalanishda sodir bo‘lgan baxtsiz hodisalar sabablarini tahlil qilgan holda, kelgusida bunday holatlarning oldini olish choralarini ko‘radi.
Izoh (0)