Oliy Majlis Qonunchilik palatasidagi O‘zbekiston Xalq demokratik partiyasi fraksiyasining yig‘ilishida Shaharsozlik faoliyati sohasidagi maʼmuriy tartib-taomillarning takomillashtirilishi munosabati bilan Shaharsozlik kodeksiga o‘zgartirishlar kiritish to‘g‘risidagi qonun loyihasi ko‘rib chiqildi. Bu haqda parlament quyi palatasi matbuot xizmati xabar berdi.
Maʼlumotlarga ko‘ra, keyingi vaqtlarda mahalliy davlat hokimiyati organlari tomonidan qurilish sohasidagi maʼmuriy tartib-taomillarga zid ravishda ko‘p holatda qurilishga ruxsat berish, rekonstruksiya qilish, vaqtinchalik bino-inshootlar qurishga ruxsat berish to‘g‘risida qarorlar qabul qilingan.
“Shuningdek, qonunchilikka nomuvofiq tarzda yer uchastkasi ajratish holatlari ham uchramoqda. Normativ-huquqiy hujjatlardagi qarama-qarshiliklar va ziddiyatlarni bartaraf etish hamda huquqni qo‘llash amaliyotini izchil va bir xilda taʼminlash zarurati Shaharsozlik kodeksiga o‘zgartirishlar kiritishni taqozo etmoqda”, — deyiladi xabarda.
Mazkur hujjat bilan mahalliy ijro etuvchi hokimiyat organlarining qurilish sohasiga oid ularga xos bo‘lmagan ayrim vakolatlari tugatilmoqda. Qonun loyihasining qabul qilinishi arxitektura va qurilish sohasidagi davlat xizmatlarini ko‘rsatish borasida amaliyotda kuzatilayotgan mavjud muammolarni, normativ-huquqiy hujjatlardagi qarama-qarshiliklarni va ortiqcha byurokratik tartib-taomillarni bartaraf etishga xizmat qiladi.
Muhokamalar davomida deputatlar qonun loyihasi yuzasidan partiya maqsad va vazifalaridan kelib chiqib bir qator takliflar bergan. Yig‘ilishda kun tartibidagi masalalar yuzasidan tegishli qarorlar qabul qilingan.
May oyida “O‘zbekiston Respublikasi aholisi va hududining seysmik xavfsizligini taʼminlash tizimini yanada takomillashtirishga oid qo‘shimcha chora-tadbirlar to‘g‘risida”gi prezident qarori qabul qilingandi. Bundan tashqari mazkur qaror bilan 2023-yil 1-dekabrdan Respublikada kuchli zilzilalar haqida erta ogohlantirish milliy tizimi bosqichma-bosqich ishga tushiriladi. Mazkur milliy tizim doirasida O‘zbekiston va unga chegaradosh hududlardagi seysmik hodisalarning monitoringi real vaqt rejimida yuritiladi.
Izoh (0)