O‘zbek tomoshabinlariga asosan salbiy rollari bilan yaxshi tanish bo‘lgan aktrisa Jamila G‘ofurova kinodagi faoliyatini ancha erta boshlagan. U 23 yillik faoliyati davomida davlat va xususiy kinostudiyalarning ko‘plab filmlarida suratga tushdi. Xo‘sh, aktrisaning ijodiy faoliyati qanday boshlangan, unga nasib etmagan rollar bormi? Jamila G‘ofurovaning tug‘ilgan kuni munosabati bilan uning hayot va ijod yo‘liga nazar tashlaymiz.
“Ota-onam xonanda bo‘lishimni istashmadi”
Aktrisa O‘zbekistonda xizmat ko‘rsatgan xonanda Shukur G‘ofurovning oilasida dunyoga kelgan. Otasi opera xonandasi bo‘lgani uchun ko‘plab san’at vakillari ularning xonadonida mehmon bo‘lishardi. Jamila G‘ofurova ham qo‘shiq aytishga va raqs tushishga qiziqardi.
.jpg)
— Onam ham san’at institutida tahsil olgan. Ammo ketma-ket farzandli bo‘lgani va dadamning ko‘p gastrol safarlarida bo‘lgani uchun karyerasidan voz kechishga majbur bo‘lgan. Esimni taniganimdan boshlab raqs tushishni va qo‘shiq aytishni yaxshi ko‘rardim. Ammo ota-onam negadir xonanda bo‘lishimni istashmadi. Hozir musiqa maktabida o‘qimaganimga afsuslanaman.
Ba’zan buning uchun ota-onamdan ranjigan paytlarim ham bo‘lgan. Onam negadir aktrisa bo‘lishimni orzu qilgan. Shu bois 14 yoshimdan “O‘zbekfilm”da o‘tkaziladigan kastinglarga olib borgan, — deydi aktrisa Jamila G‘ofurova.
“Kastingdan o‘tolmaganman”
Aktrisa debyut rolga tasdiqlanishi qiyin kechgani va to‘laroq bo‘lgani uchun bu rolni Sevinch Mo‘minova ilib ketgani haqida so‘zlab bergan.
— Birinchi o‘ynagan kinomning o‘zidayoq kasting topshirganman. “Meshpolvon” deb nomlangan bolalar uchun ishlangan filmning kastingidan o‘ta olmaganman. Undan so‘ng 16 yoshimda “Dilxiroj” deb nomlangan filmga Alisher Hamroyev, Sevinch Mo‘minovalar bilan birga kelganman. O‘shanda to‘lachaligim uchun bosh rolga olishmagan.
“Dilxiroj” filmida kasting ham bo‘lmagan, “Siz qaysi rolga keldingiz”, deyishganida “Bosh rolga keldim, bosh rolni o‘ynayman”, deganman. O‘shanda rejissor “Jamila, agar bosh rolni o‘ynamoqchi bo‘lsangiz, ozishingizga to‘g‘ri keladi, siz ozgina to‘lachasiz”, degan edi. Haqiqatan ham, to‘lacha qiz edim, bosh rolga ham to‘g‘ri kelmas edim, biroq kim o‘zini “men to‘laman, bosh rolga ham to‘g‘ri kelmayman”, deb aytadi.
“Mayli kichkina bo‘lsa ham, rol beringlar, kadrda yugurib o‘tsam ham mayli”, deganim uchun menga Sevinchning dugonasi rolini berishgan edi.
Suratga olish ishlari Surxondaryo viloyatida bo‘lgan edi. Tasvirga olish ishlari qirq kun davom etgan bo‘lib, mening rolim dastlabki kunlardayoq o‘tib bo‘lgan, ikki sekundlik rol edi.
O‘sha filmda gapirgan gapim hozir ham esimda: “Bor, yo‘qol, mishiqi” so‘zlaridan iborat jumla edi. Rolimni o‘ynab bo‘lgandan so‘ng ham ketmasdan, rejissorga “U-bu o‘tib ketadigan joylari bo‘lsa, o‘ynarman”, deb suratga olish maydonchasidan ketmasdan, qirq kun qolganman, — deydi Jamila G‘ofurova.
“Bu qarorimdan afsuslanaman”
Jamila G‘ofurova filmlarda epizod rollarni ijro etib yursa-da, maktabni tamomlab san’at institutiga hujjat topshirmaydi. Ammo keyinchalik bu qaroridan afsuslanadi.
— Oilaviy sharoitimiz sabab 8 yil deganda Sharqshunoslik institutini tamomlaganman. U institutga nega hujjat topshirganimni haligacha tushunmayman. Ba’zan suratga olish ishlari ko‘payib ketgani yoki boshqa sabablarga ko‘ra akademik ta’til olishimga to‘g‘ri kelardi. Shartnoma asosida o‘qiganman, mendan keyin singlim ham to‘lov asosida o‘qishga qabul qilingan. O‘qishimiz ota-onamga oson kechmagani aniq. Oradan ancha yil o‘tib, 2012-yili O‘zbekiston davlat san’at va madaniyat institutiga hujjat topshirganman. Ammo aktrisalik yo‘nalishida emas, rejissorlik bo‘yicha tahsil olganman, — deydi aktrisa Jamila G‘ofurova.
“Eng ko‘p olgan gonorarim...”
Aktrisa “Faryod” filmida katta gonorar olgani va shu roli sabab mashinali bo‘lgani haqida so‘zlab bergan.
— Avvallari eng ko‘p gonorar oladigan aktrisa men bo‘lganman. Filmlarda rol ijro qilishim uchun bitta mashinaning pulini olganman, bugungi kunga hisoblaydigan bo‘lsak, o‘sha pulga bitta Spark avtomashinasini sotib olish mumkin edi. U filmning nomini ham aytishim mumkin, film “Uzuk” deb nomlangan edi.
“Faryod” filmidan juda katta gonorar olganman. “Faryod” filmi yaxshi chiqqani uchun film prodyuserlari, oilaviy kelishgan holda menga Nexia mashinasini sovg‘a qilgan edi. O‘sha Nexia mening birinchi mashinam bo‘lgan edi, — deydi Jamila G‘ofurova.
“Baron sabab puldan quruq qolganman”
Jamila G‘ofurova salbiy rollarni ijro etishdan qo‘rqmaydigan aktrisalardan biri hisoblanadi. U “Baron” filmidagi roli sabab odamlarning nafratiga uchragani va yaxshigina mablag‘dan quruq qolgani haqida so‘zlab berdi.
— “Baron” filmiga taklif etishganda onamga ssenariyni o‘qitdim. Qo‘rqib ketdim, rolni rad etmoqchi bo‘lib turganimda onam “Aktrisa har qanday rolni ijro etishi kerak, nega ikkilanyapsan? Bu rolni ham kimdir ijro etishi kerak-ku”, dedi. Ana shu gapdan keyin rolni ijro etishga rozi bo‘ldim. Ammo film premyerasidan keyin shirinlik firmasidan yaxshigina mablag‘ga reklama taklif etishdi. Rejissor bilan firma rahbarining oldiga borganimizda meni ko‘rib “Yo‘q, bu aktrisa mahsulotlarimizni reklama qilishini istamayman. Axir u jiyanini sotib, opasini o‘ldirgan-ku”, dedi. Xullas, “Baron”dagi rolim sabab yaxshigina mablag‘dan quruq qolganman, — deydi aktrisa Jamila G‘ofurova.
“O‘zingizga o‘xshamay qolibsiz”
Aktrisa 15 yil avval oila qurgan. Bu nikohdan Shirina ismli qiz farzandli bo‘lgan. Ammo ancha yilgacha turmush o‘rtog‘i bilan ajrashganini sir tutgan. Keyin negadir ekranlarda umuman ko‘rinmay qolgan.
— Farzandli bo‘lganimdan keyin ancha to‘lishganman. Bu o‘zimga ham qator noqulayliklarni tug‘dirgan. Shunday kunlar ham kelganki, rejissorlar vaznim ortgani uchun rollar bermay qo‘yishdi. Shundan keyin ozishga jiddiy ahd qildim. Ozganimdan keyin esa “O‘zingizga o‘xshamay qolibsiz”, deganlar ham bo‘ldi. Xullas, odamlarga birdek yoqish qiyin. Muhimi, inson o‘zini sevsa va o‘ziga qulay sharoitda yashasa bo‘ldi, — deydi aktrisa Jamila G‘ofurova.
Erim ko‘chada “zvezda”
Aktrisa 2020-yili uchinchi bor ona bo‘ldi. Ammo u kunga qadar ommaga oila qurgani haqida sir saqlagan edi. U intervyularining birida turmush o‘rtog‘i san’atdan yiroq sohada faoliyat yuritishi va o‘ta rashkchi inson ekanligi haqida aytib o‘tgandi.
— Turmush o‘rtog‘im o‘qimagan, ammo omadli inson. Tadbirkorlik bilan shug‘ullanadi. O‘zim ikkita institutni tugatganim uchun turmush o‘rtog‘im ham tahsil olishini istayman. Uning o‘ziga yarasha olami bor. U ko‘chada “zvezda”.
Oilamni, farzandli bo‘lganimni sir saqlaganim yo‘q. Faqat ayni karantin avj olgan paytda o‘g‘il farzandli bo‘ldim. Karantin sabab tug‘uruqxonadan ham oddiygina libos va maxsus pardoz-andozsiz chiqishimizga to‘g‘ri keldi. Marosimlarni ham oila davrasida, kamtarona qilib o‘tkazishga qaror qildik. Shu bois bu xabarni e’lon qilishga ham zarurat tug‘ilmadi, — deydi aktrisa.
Aktrisa ayni kunda nafaqat kinoda, balki teatrda ham faoliyat yuritadi. U Sayfiddin Meliyev rejissorligida tashkil etilgan “Turon” teatr studiyasida ishlaydi.
Izoh (0)