Ijtimoiy tarmoqlarda Azzamchik taxallusi bilan tanilgan A’zam Mullajonov 1994-yili Farg‘ona viloyatida tavallud topgan. U musiqa maktabidan so‘ng, Farg‘ona san’at kollejida tahsil olgan. Qo‘qon davlat pedagogika institutining musiqa fakultetida o‘qigan. Bir necha yildan buyon Qo‘qondagi musiqa maktabida o‘quvchilarga saboq beradi.
.jpg)
A’zam Mullajonov avvaliga maqom, undan so‘ng milliy estrada yo‘nalishidagi qo‘shiqlarni ijro etgan. Pedagoglik faoliyatidan tashqari, ijod bilan shug‘ullangan. Ammo qo‘shiqlarining hech biri muvaffaqiyat qozonmagan. 2022-yil esa unga chinakamiga omadli keldi.
“Salom aleykum” qo‘shig‘i kutilmagan natijani qayd etib, xonandaning ijtimoiy tarmoq yulduziga aylanishi sabab bo‘ldi. To‘g‘ri, uni o‘zbek tinglovchilari orasida muxlislari ko‘p emas, ammo Markaziy Osiyo, Saudiya Arabistoni va Rossiyada tinglovchilari juda ko‘p. Shu boisdan ham u juda qisqa vaqtda xorijning ko‘plab davlatlarida konsert berdi. Bundan tashqari, san’atda boshqalarga o‘xshamaydigan yo‘nalishda ijod qilmoqda. Uning “Salom aleykum”, “Rozalina”, “Dyadya Vasya” va “Margarita” kabi qo‘shiqlari tanilishiga sabab bo‘ldi.
“Daryo”ning YouTube dagi kanalida yosh ijodkor A’zam Mullajonov bilan intervyu tashkil etildi. Bu xonanda qisqa vaqt ichida ijtimoiy tarmoqlar yulduziga aylangan va olti oy ichida xorijlik prodyuserlar taklifi bilan oltita davlatda konsert dasturini o‘tkazgan. Xonanda tasodifan yaratilgan qo‘shig‘i unga omad olib keltirgani, shaxsiyatidagi og‘riqli nuqtalar va fransiyalik prodyuser bilan imzolangan 105 ming AQSH dollarli shartnoma haqida so‘zlab berdi.
— Oilamizda san’atkorlar yo‘q, ammo gitara chalib qo‘shiq aytish otamning eng sevimli hobbilaridan biri bo‘lgan ekan. Onamning aytishicha, juda kichkinaligimdan boshlab, xontaxtalarni urib, qo‘shiq aytishni boshlagan ekanman. Qiziqishim ortavergandan keyin onam musiqa maktabiga olib borgan. Fortepiano bo‘limiga o‘qishga bermoqchi bo‘lganida ustozlar, agar uyingizda pianino bo‘lmasa, bola qiynalib qoladi, deyishgan ekan. Pianino sotib olishga imkoniyatimiz bo‘lmagani uchun rubob bo‘yicha tahsil olganman. Keyin ikki yil mobaynida maqom yo‘nalishida ham o‘qiganman. U paytlarda qiziqishlarim butunlay boshqacha edi. Milliy qo‘shiqlarni va cholg‘u-asboblarini o‘rganishga qiziqardim. Ammo 9-sinf bo‘lganimdan keyin Shohruh reperning ijodiga qiziqib qolganman, — deydi xonanda A’zam Mullajonov.
Xonanda bolaligidagi og‘riqli damlar va 18 yil davomida otasini ko‘rmagani haqida so‘zlab berdi.
— Oilaning kenja farzandiman. Afsuski, ota-onam juda kichkinalik paytimda ajrashib ketgan. Olti yoshimda dadam onam bilan yashaydigan uyimizga kelib, “Men Rossiyaga ketyapman. Sizga pultli mashina va kompyuter olib kelaman”, deb va’da bergan. Onamning aytishicha ancha vaqtgacha dadamning qaytishini intizor bo‘lib kutgan ekanman.
Bir kuni onam “Endi sizning otangiz ham, onangiz ham o‘zimman. Kompyuterni ham o‘zim olib beraman, endi dadangizni kutmang”, degandan keyin eshik oldida kutmay qo‘ygan ekanman. Dadam bizdan umuman xabar olmadi, oradan naqd 18 yil o‘tganidan keyin Telegram orqali aloqaga chiqdi.
Hozir dadam ham Qo‘qonda yashaydi, aloqalarimiz yaxshi. U insonga nisbatan ko‘nglimda zarracha xiralik yo‘q. Onam biz farzandlarning kam-ko‘stsiz ulg‘ayishi uchun qo‘ldan kelgancha harakat qilgan. U yo‘lga pul sarflashni istamay, piyoda ishga qatnardi.
Bolalikda juda sho‘x va muomalasiz bola bo‘lganman. Onamni ko‘p qiynaganman. “Hozir uyga boraman, ana qaytyapman”, deb onamni xavotirga qo‘yardim. Hozir o‘ylab qarasam o‘sha vaqtda onamga juda qiyin bo‘lgan ekan. Qornimizdan tashqari, ikki o‘g‘ilni tarbiyalash oson kechmagan. Onam hamisha do‘stdek suhbatlashishga harakat qilardi. Shu boisdanmi otamning yo‘qligi sezilmagan, — deydi xonanda A’zam Mullajonov.
Xonanda omad keltirgan “Salom alaykum” qo‘shig‘ining yaratilish tarixi va fransuz prodyuserlari bilan tuzilgan shartnoma haqida so‘zlab berdi.
— Bir kuni o‘zimning kamtarona studiyamda o‘tirganimda bu qo‘shiqning g‘oyasi paydo bo‘lgan. O‘shanda dumaloq lampa xarid qilgandim. Qo‘shiqning ilk xomaki variantda ijro etib, telefonda video olganman. Uni Tik-Tok tarmog‘iga joylaganimda qisqa vaqtda 100 ming marotaba ko‘rilgan. Bu men uchun juda katta natija edi.
Ana shunday keyin bu qo‘shiqqa bo‘lgan talab yanada ortib ketdi. Eng qizig‘i, qo‘shiq tinglovchilarining aksariyatini xorijliklar tashkil etadi. Bir oy ichida konsert berish taklifi bilan Qirg‘iziston va Turkiyadan chiqishdi. Aslida bu ilk mualliflik qo‘shig‘im emas. Bundan avval ham ko‘p qo‘shiqlar yaratganman. Ammo ularning hech biri “Salom alaykum” kabi omadli bo‘lmagan.
Shu kungacha, Qirg‘iziston, Rossiya, Saudiya Arabistoni va Ozarbayjon kabi davlatlarda konsert berdim. Yaqin kunlarda esa Turkiyada o‘tkaziladigan konsertga tayyorgarlik ko‘ryapman. Quvonarlisi, fransiyalik prodyuserlik kompaniyasi bilan birga 4 ta qo‘shiq va ikkita albomni yaratib berish uchun shartnoma imzolaganman. Ular qo‘shiq va kliplarni faqatgina platformalarga joylaydi. Shartnoma 105 ming AQSH dollariga baholangan, — deydi xonanda A’zam Mullajonov.
Suhbatni to‘liq holda tomosha qilishingizni tavsiya etamiz.
Izoh (0)