Ўзбек томошабинларига асосан салбий роллари билан яхши таниш бўлган актриса Жамила Ғофурова кинодаги фаолиятини анча эрта бошлаган. У 23 йиллик фаолияти давомида давлат ва хусусий киностудияларнинг кўплаб фильмларида суратга тушди. Хўш, актрисанинг ижодий фаолияти қандай бошланган, унга насиб этмаган роллар борми? Жамила Ғофурованинг туғилган куни муносабати билан унинг ҳаёт ва ижод йўлига назар ташлаймиз.
“Ота-онам хонанда бўлишимни исташмади”
Актриса Ўзбекистонда хизмат кўрсатган хонанда Шукур Ғофуровнинг оиласида дунёга келган. Отаси опера хонандаси бўлгани учун кўплаб санъат вакиллари уларнинг хонадонида меҳмон бўлишарди. Жамила Ғофурова ҳам қўшиқ айтишга ва рақс тушишга қизиқарди.
.jpg)
— Онам ҳам санъат институтида таҳсил олган. Аммо кетма-кет фарзандли бўлгани ва дадамнинг кўп гастрол сафарларида бўлгани учун карьерасидан воз кечишга мажбур бўлган. Эсимни таниганимдан бошлаб рақс тушишни ва қўшиқ айтишни яхши кўрардим. Аммо ота-онам негадир хонанда бўлишимни исташмади. Ҳозир мусиқа мактабида ўқимаганимга афсусланаман.
Баъзан бунинг учун ота-онамдан ранжиган пайтларим ҳам бўлган. Онам негадир актриса бўлишимни орзу қилган. Шу боис 14 ёшимдан “Ўзбекфильм”да ўтказиладиган кастингларга олиб борган, — дейди актриса Жамила Ғофурова.
“Кастингдан ўтолмаганман”
Актриса дебют ролга тасдиқланиши қийин кечгани ва тўлароқ бўлгани учун бу ролни Севинч Мўминова илиб кетгани ҳақида сўзлаб берган.
— Биринчи ўйнаган киномнинг ўзидаёқ кастинг топширганман. “Мешполвон” деб номланган болалар учун ишланган фильмнинг кастингидан ўта олмаганман. Ундан сўнг 16 ёшимда “Дилхирож” деб номланган фильмга Алишер Ҳамроев, Севинч Мўминовалар билан бирга келганман. Ўшанда тўлачалигим учун бош ролга олишмаган.
“Дилхирож” фильмида кастинг ҳам бўлмаган, “Сиз қайси ролга келдингиз”, дейишганида “Бош ролга келдим, бош ролни ўйнайман”, деганман. Ўшанда режиссёр “Жамила, агар бош ролни ўйнамоқчи бўлсангиз, озишингизга тўғри келади, сиз озгина тўлачасиз”, деган эди. Ҳақиқатан ҳам, тўлача қиз эдим, бош ролга ҳам тўғри келмас эдим, бироқ ким ўзини “мен тўламан, бош ролга ҳам тўғри келмайман”, деб айтади.
“Майли кичкина бўлса ҳам, рол беринглар, кадрда югуриб ўцам ҳам майли”, деганим учун менга Севинчнинг дугонаси ролини беришган эди.
Суратга олиш ишлари Сурхондарё вилоятида бўлган эди. Тасвирга олиш ишлари қирқ кун давом этган бўлиб, менинг ролим дастлабки кунлардаёқ ўтиб бўлган, икки секундлик рол эди.
Ўша фильмда гапирган гапим ҳозир ҳам эсимда: “Бор, йўқол, мишиқи” сўзларидан иборат жумла эди. Ролимни ўйнаб бўлгандан сўнг ҳам кетмасдан, режиссёрга “У-бу ўтиб кетадиган жойлари бўлса, ўйнарман”, деб суратга олиш майдончасидан кетмасдан, қирқ кун қолганман, — дейди Жамила Ғофурова.
“Бу қароримдан афсусланаман”
Жамила Ғофурова фильмларда эпизод ролларни ижро этиб юрса-да, мактабни тамомлаб санъат институтига ҳужжат топширмайди. Аммо кейинчалик бу қароридан афсусланади.
— Оилавий шароитимиз сабаб 8 йил деганда Шарқшунослик институтини тамомлаганман. У институтга нега ҳужжат топширганимни ҳалигача тушунмайман. Баъзан суратга олиш ишлари кўпайиб кетгани ёки бошқа сабабларга кўра академик таътил олишимга тўғри келарди. Шартнома асосида ўқиганман, мендан кейин синглим ҳам тўлов асосида ўқишга қабул қилинган. Ўқишимиз ота-онамга осон кечмагани аниқ. Орадан анча йил ўтиб, 2012 йили Ўзбекистон давлат санъат ва маданият институтига ҳужжат топширганман. Аммо актрисалик йўналишида эмас, режиссёрлик бўйича таҳсил олганман, — дейди актриса Жамила Ғофурова.
“Энг кўп олган гонорарим...”
Актриса “Фарёд” фильмида катта гонорар олгани ва шу роли сабаб машинали бўлгани ҳақида сўзлаб берган.
— Авваллари энг кўп гонорар оладиган актриса мен бўлганман. Фильмларда рол ижро қилишим учун битта машинанинг пулини олганман, бугунги кунга ҳисоблайдиган бўлсак, ўша пулга битта Spark автомашинасини сотиб олиш мумкин эди. У фильмнинг номини ҳам айтишим мумкин, фильм “Узук” деб номланган эди.
“Фарёд” фильмидан жуда катта гонорар олганман. “Фарёд” фильми яхши чиққани учун фильм продюсерлари, оилавий келишган ҳолда менга Nexia машинасини совға қилган эди. Ўша Nexia менинг биринчи машинам бўлган эди, — дейди Жамила Ғофурова.
“Барон сабаб пулдан қуруқ қолганман”
Жамила Ғофурова салбий ролларни ижро этишдан қўрқмайдиган актрисалардан бири ҳисобланади. У “Барон” фильмидаги роли сабаб одамларнинг нафратига учрагани ва яхшигина маблағдан қуруқ қолгани ҳақида сўзлаб берди.
— “Барон” фильмига таклиф этишганда онамга сценарийни ўқитдим. Қўрқиб кетдим, ролни рад этмоқчи бўлиб турганимда онам “Актриса ҳар қандай ролни ижро этиши керак, нега иккиланяпсан? Бу ролни ҳам кимдир ижро этиши керак-ку”, деди. Ана шу гапдан кейин ролни ижро этишга рози бўлдим. Аммо фильм премьерасидан кейин ширинлик фирмасидан яхшигина маблағга реклама таклиф этишди. Режиссёр билан фирма раҳбарининг олдига борганимизда мени кўриб “Йўқ, бу актриса маҳсулотларимизни реклама қилишини истамайман. Ахир у жиянини сотиб, опасини ўлдирган-ку”, деди. Хуллас, “Барон”даги ролим сабаб яхшигина маблағдан қуруқ қолганман, — дейди актриса Жамила Ғофурова.
“Ўзингизга ўхшамай қолибсиз”
Актриса 15 йил аввал оила қурган. Бу никоҳдан Ширина исмли қиз фарзандли бўлган. Аммо анча йилгача турмуш ўртоғи билан ажрашганини сир тутган. Кейин негадир экранларда умуман кўринмай қолган.
— Фарзандли бўлганимдан кейин анча тўлишганман. Бу ўзимга ҳам қатор ноқулайликларни туғдирган. Шундай кунлар ҳам келганки, режиссёрлар вазним ортгани учун роллар бермай қўйишди. Шундан кейин озишга жиддий аҳд қилдим. Озганимдан кейин эса “Ўзингизга ўхшамай қолибсиз”, деганлар ҳам бўлди. Хуллас, одамларга бирдек ёқиш қийин. Муҳими, инсон ўзини севса ва ўзига қулай шароитда яшаса бўлди, — дейди актриса Жамила Ғофурова.
Эрим кўчада “звезда”
Актриса 2020 йили учинчи бор она бўлди. Аммо у кунга қадар оммага оила қургани ҳақида сир сақлаган эди. У интервьюларининг бирида турмуш ўртоғи санъатдан йироқ соҳада фаолият юритиши ва ўта рашкчи инсон эканлиги ҳақида айтиб ўтганди.
— Турмуш ўртоғим ўқимаган, аммо омадли инсон. Тадбиркорлик билан шуғулланади. Ўзим иккита институтни тугатганим учун турмуш ўртоғим ҳам таҳсил олишини истайман. Унинг ўзига яраша олами бор. У кўчада “звезда”.
Оиламни, фарзандли бўлганимни сир сақлаганим йўқ. Фақат айни карантин авж олган пайтда ўғил фарзандли бўлдим. Карантин сабаб туғуруқхонадан ҳам оддийгина либос ва махсус пардоз-андозсиз чиқишимизга тўғри келди. Маросимларни ҳам оила даврасида, камтарона қилиб ўтказишга қарор қилдик. Шу боис бу хабарни эълон қилишга ҳам зарурат туғилмади, — дейди актриса.
Актриса айни кунда нафақат кинода, балки театрда ҳам фаолият юритади. У Сайфиддин Мелиев режиссёрлигида ташкил этилган “Турон” театр студиясида ишлайди.
Изоҳ (0)