Rossiyada josuslikda ayblanib hibsga olingan Wall Street Journal muxbiri Evan Gershkovichning oilasi Birlashgan Millatlar Tashkilotidan uni ozod etishda yordam so‘radi. Bu haqda Reuters xabar bermoqda.
Gershkovichning qarindoshlari BMTning O‘zboshimchalik bilan hibsga olishni tekshiruvchi ishchi guruhiga petitsiya yuborgan.
“Ushbu bayonot Evanning hibsga olinishi inson huquqlarining buzilishi ekani va Rossiya uni zudlik bilan ozod qilishi kerakligini tushuntiradi. Biz faqat uning uyiga qaytishini istaymiz”, — dedi jurnalistning otasi Mixail Gershkovich jurnalistlarga.
AQSHning BMTdagi elchisi Linda Tomas-Grinfild “hech bir oila o‘zi yaqinlaridan siyosiy piyoda sifatida foydalanilishini tomosha qilmasligi kerak”, dedi.
“Prezident Putin aynan shunday qilyapti. Rossiyaning harakatlari shafqatsizlikdan ham oshib ketmoqda. Va bu xalqaro huquqni buzishdir”, — deya qo‘shimcha qildi u.
Mart oyi oxirida The Wall Street Journal muxbiri Evan Gershkovich Yekaterinburgda josuslikda ayblanib hibsga olingandi. Aprel oyining boshidan beri u “Lefortovo” tergov izolyatorida. 24-avgust kuni Moskvaning Lefortovo tuman sudi jurnalistni hibsga olish muddatini 30-noyabrgacha uzaytirdi.
Rossiya FXX ma’lumotlariga ko‘ra, muxbir “Amerika tomonining ko‘rsatmasi bo‘yicha” Rossiya harbiy-sanoat kompleksi korxonalaridan biri haqida maxfiy ma’lumotlarni to‘plagan. Meduza xabariga ko‘ra, Gershkovich hibsga olinishidan avval “Uralvagonzavod” mudofaa zavodi joylashgan Nijniy Tagil shahriga borgan. Gershkovich bilan bir vaqtda yana ikki kishi —“Uralvagonzavod”da ishlagan nijniy tagillik er-xotin hibsga olingan.
Bundan tashqari, aprel oyida Gershkovich hibsga olingani haqida birinchi bo‘lib gapirgan piar mutaxassisi Yaroslav Shirshikov hibsga olingan. Iyun oyida Shirshikov tergov izolyatoridan ozod qilindi.
Aprel oyida AQSH Davlat departamenti Gershkovichni “nohaq hibsga olingan” deb e’lon qildi, bu uni almashish bo‘yicha muzokaralarga yo‘l ochishi kerak edi.
Izoh (0)