Yana bir ayol “Manchester Yunayted” futbolchisi Antoni unga jinsiy zo‘ravonlik qilmoqchi bo‘lganini ta’kidladi

Bank xodimi bo‘lgan Ingrid Lana “Manchester Yunayted” futbolchisi Antoniga unga tegajog‘lik qilmoqchi bo‘lganini ma’lum qildi.

33 yoshli ayol RecordTV telekanaliga intervyu berdi va 2022-yilda braziliyalik futbolchi unga jinsiy zo‘ravonlik qilmoqchi bo‘lganini aytib o‘tdi. Suhbatning to‘liq qismi yakshanba kuni chiqishi ma’lum qilindi.

Lananing so‘zlariga ko‘ra, oktabr oyida “Manchester Yunayted” vingeri uni uyiga chaqirgan: “Mening maqsadim faqat biznes edi. Lekin uyiga yetib borgach, uning maqsadi boshqa ekanligini angladim. U menga tegajog‘lik qilmoqchi bo‘ldi, biroq men qarshilik ko‘rsatdim. Keyin esa u meni devorga itarib yubordi”.

Avvalroq, mankunianliklar futbolchisi sobiq sevgilisiga ham jismoniy tajozuv qilgani xabar qilingandi. Ushbu vaziyat tufayli Antoni Braziliya terma jamoasining sentabr oyidagi o‘yinlaridan chetlatilgandi. “Manchester Yunayted” esa futbolchi bilan bog‘liq vaziyat nazoratda ekanligini aytib, bayonot bergandi.