Warner Bros Discovery to‘rt oydan beri davom etayotgan Gollivud ssenaristlari va aktyorlarining ish tashlashi kompaniyaning yillik daromadini 300-500 million dollarga qisqartirishi mumkin, deb yozmoqda “Pravila jizni” nashri.
Hisobotda ta’kidlanganidek, Warner Bros Discovery’ning joriy yildagi umumiy daromadi avval kutilganidek 11 milliard dollar emas, balki 10,5 milliard dollar bo‘lishi mumkin. Kompaniya rahbariyati ish tashlashlar to‘xtatilishiga umid qilishini ham ta’kidlagan.
Shu bilan birga, kinostudiya vakillarining ta’kidlashicha, 2023-yilning uchinchi choragida “Barbi” filmining kassasi, shuningdek, ish tashlashlar bilan bog‘liq qo‘shimcha omillar tufayli pul oqimi 1,7 milliard dollardan oshadi.
Avvalroq AQShda yozuvchi va aktyorlarning ish tashlashi butun Kaliforniya iqtisodiga qariyb 5 milliard dollarga tushgani va kutilganidek, bu miqdor o‘sishda davom etishi xabar qilingandi. Variety nashri ma’lumotlariga ko‘ra, Gollivud studiyalari aktyorlar va ssenariy mualliflarining ish tashlashlari tufayli ishlab chiqarilishi to‘xtatilgan har bir yirik loyihadan haftasiga kamida 600 ming dollar yo‘qotadi.
Ish tashlash to‘rt oydan beri davom etmoqda. U birinchi marta Amerika Yozuvchilar uyushmasi tomonidan e’lon qilingan. Iyul oyi o‘rtalarida ish tashlashga Gollivud aktyorlari ham qo‘shildi. Asosiy talablar — to‘lovlarni oshirish va insonlarni ChatGPT kabi neyron tarmoqlar bilan almashtirishni taqiqlash bo‘lmoqda.
E’tirozlar tufayli studiyalar taniqli teleseriallar va filmlar ishlab chiqarishni to‘xtatib qo‘ydi, bir qancha shov-shuvli premyeralarni, xususan, “Dyuna 2”, “Godzilla” va “Kong: Yangi imperiya” va boshqa filmlarning namoyish etishni keyinroqqa qoldirdi.
Izoh (0)