1990-yillarning eng mashhur modellaridan biri bo‘lgan Linda Yevangelista The Wall Street Journal nashriga bergan intervyusida unga so‘nggi besh yil ichida ikki marta ko‘krak bezi saratoni tashxisi qo‘yilgani haqida gapirib berdi.
U kasalligi haqida birinchi marta 2018-yilda, mammografiya tekshiruvidan o‘tganidan keyin bilib olgan.
“Natijalar unchalik yaxshi emas edi, shuning uchun sog‘lig‘imdagi boshqa muammolarni hisobga olib, men bu ishni ikkilanmasdan qilishga qaror qildim”, — deydi Yevangelista.
Operatsiyadan so‘ng model ahvoli yaxshilanganiga va hayotga tayyor ekaniga ishongan, biroq 2022-yilning iyul oyida unga yana ko‘krak saratoni tashxisi qo‘yilgan.
“Nima qilsangiz qiling, go‘zalligimni yo‘qotsam ham, mayli, men saratondan o‘lishni istamayman”, — deya qo‘shimcha qiladi model.
Yaqinda operatsiya, kimyoterapiya va radiatsiya terapiyasi kurslaridan so‘ng Yevangelistaning onkologi uning sog‘lig‘i haqidagi prognozlarini e’lon qildi va modelning ahvoli qoniqarli ekanligini aytdi, shu bilan birga, u saratonning qaytalanish ehtimolini ko‘rsatadigan onkotayp testidan “dahshatli” natijalarga egaligini ta’kidlagan. Model o‘zini “kutish rejimida omon qolgan inson” deb ataydi.
“Bir oyog‘im go‘rda ekanligini bilaman, ammo hozir butunlay boshqa rejimga o‘tdim. Sog‘lig‘im bilan bog‘liq jiddiy muammolarni boshdan kechirdim. Biroq tirikligimdan juda xursandman. Hozir qolgan hamma narsa — bonusdir”, — deydi Yevangelista.
Modelning muvaffaqiyatsiz kosmetik muolajasi
Besh yil davomida ommaga ko‘rinish bermagan Linda Yevangelista 2022-yilning fevral oyida uzoq muddat davom etgan depressiya va 2015-yilning avgusti hamda 2016-yilning fevralida iyak sohasidagi yog‘larni muzlatish bo‘yicha o‘tkazilgan kosmetik muolajadan keyin ko‘chaga chiqa olmay qolgani haqida gapirgan edi.
Modelning so‘zlariga ko‘ra, 2016-yil iyun oyida shifokor unga ortiqcha yog‘ paydo bo‘lishiga olib keladigan paradoksal yog‘ giperplaziyasi tashxisini qo‘ygan. Bu bemorlarning 1 foizidan kamiga ta’sir qiladigan kam uchraydigan nojo‘ya ta’sir hisoblanadi. Hatto yog‘ni olib tashlash bo‘yicha ikkita operatsiya ham Yevangelistaga yordam bermagan, u yana qaytalangan.
Izoh (0)