Reper Dreyk uyiga mebel olishga yig‘gan pulini uning konserti chiptasiga sarflagan muxlisiga 50 ming dollar sovg‘a qildi (video)

Kanadalik reper Dreyk yaqinda Las-Vegasdagi konsert dasturida muxlisiga 50 ming dollar pul sovg‘a qildi, deb xabar bermoqda “Korrespondent.net” nashri.

Xonanda o‘z chiqishi davomida qo‘lida: “Dreyk, men sizning ikkita shoungizda ishtirok etish uchun mebelga yig‘gan pulimni sarfladim” degan yozuvni ushlab turgan muxlisni ko‘rdi.

Mebel uchun ajratilgan pulni sarflagan yigitni ko‘rgan xonanda unga uyini jihozlash uchun pul berishini aytgan.

“Bilasizmi, men sizga 50 ming dollar beraman, chunki sizni yaxshi ko‘raman. Bugun kechqurun pulingiz qo‘lingizda bo‘lishiga ishonavering. Eshiting, bu hayot. Bugun men sizga nimanidir o‘rgatmoqchiman. Kechqurun nimanidir tushunishingizni istayman. Siz hech qachon har bir insonning — yoningizdagi, o‘ng tomoningizdagi, orqangizdagi insonning ichidan nimalar o‘tayotganini bilmaysiz”, — deydi xonanda.