Голливуд сценаристлари ва актёрларининг иш ташлаши Warner Bros’га 500 млн доллар зарар келтириши мумкин

Warner Bros Discovery тўрт ойдан бери давом этаётган Голливуд ссенаристлари ва актёрларининг иш ташлаши компаниянинг йиллик даромадини 300-500 миллион долларга қисқартириши мумкин, деб ёзмоқда “Правила жизни” нашри.  

Ҳисоботда таъкидланганидек, Warner Bros Discovery’нинг жорий йилдаги умумий даромади аввал кутилганидек 11 миллиард доллар эмас, балки 10,5 миллиард доллар бўлиши мумкин. Компания раҳбарияти иш ташлашлар тўхтатилишига умид қилишини ҳам таъкидлаган.

Шу билан бирга, киностудия вакилларининг таъкидлашича, 2023 йилнинг учинчи чорагида “Барби” фильмининг кассаси, шунингдек, иш ташлашлар билан боғлиқ қўшимча омиллар туфайли пул оқими 1,7 миллиард доллардан ошади.

Аввалроқ АҚШда ёзувчи ва актёрларнинг иш ташлаши бутун Калифорния иқтисодига қарийб 5 миллиард долларга тушгани ва кутилганидек, бу миқдор ўсишда давом этиши хабар қилинганди. Variety нашри маълумотларига кўра, Голливуд студиялари актёрлар ва сценарий муаллифларининг иш ташлашлари туфайли ишлаб чиқарилиши тўхтатилган ҳар бир йирик лойиҳадан ҳафтасига камида 600 минг доллар йўқотади.

Иш ташлаш тўрт ойдан бери давом этмоқда. У биринчи марта Америка Ёзувчилар уюшмаси томонидан эълон қилинган. Июль ойи ўрталарида иш ташлашга Голливуд актёрлари ҳам қўшилди. Асосий талаблар — тўловларни ошириш ва инсонларни ChatGPT каби нейрон тармоқлар билан алмаштиришни тақиқлаш бўлмоқда.

Эътирозлар туфайли студиялар таниқли телесериаллар ва фильмлар ишлаб чиқаришни тўхтатиб қўйди, бир қанча шов-шувли премьераларни, хусусан, “Дюна 2”, “Godzilla” ва “Конг: Янги империя” ва бошқа фильмларнинг намойиш этишни кейинроққа қолдирди.