Xitoy yetakchisi Si Szinpin shu hafta Hindistonda bo‘lib o‘tadigan G20 sammitida qatnashmasligi haqidagi xabar Pekin G‘arb va uning ittifoqchilaridan o‘zini uzoq tutayotgani haqidagi xavotirli tendensiyani tasdiqladi. Bu haqda Reuters agentligi Xitoydagi xorijiy diplomatlarning ko‘rsatmalariga tayanib xabar bermoqda.
“Xitoyda ishlayotgan 10 dan ortiq g‘arbliklar Reuters agentligiga Xitoydagi ma’lumot manbalariga kirishda duch kelayotgan qiyinchiliklar ortib borayotgani haqida aytib berishdi”, deb yozadi nashr.
Masalan, Pekindagi G‘arb rasmiylarining xabar berishicha, Xitoy siyosatini dunyoga tushuntirishda muhim rol o‘ynaydigan Xitoy rasmiylari yoki hattoki davlat tahlil markazlari olimlari bilan aloqaga chiqish kamaygan.
Ba’zi diplomatlarning xabar berishicha, oliy martabali mehmonlarning tashriflarini rejalashtirish, shuningdek, protokollar tuzish va ommaviy axborot vositalariga chiqishini ta'minlash tobora qiyinlashib bormoqda.
Avvalroq Xitoy hukumati 9—10-sentabr kunlari bo‘lib o‘tadigan G20 yig‘ilishiga boradigan Pekin delegatsiyasiga bosh vazir Li Syan rahbarlik qilishini tasdiqlagan edi.
Tadbir, xususan, Si Szinpinning AQSH prezidenti Jo Bayden bilan uchrashishi mumkin bo‘lgan joy sifatida ko‘rilgandi, ammo endi uchrashuvning navbatdagi ehtimoliy sanasi noyabr oyida San-Fransiskoda bo‘lib o‘tadigan Osiyo-Tinch okeani iqtisodiy hamkorligi sammiti bo‘lishi kutilmoqda.
Izoh (0)