AQSH prezidenti Jo Bayden Xitoy rahbari Si Szinpinning shu oy Nyu-Dehlida bo‘lib o‘tadigan G20 sammitida ishtirok etmasligidan hafsalasi pir bo‘lganini aytdi. Bu haqda Reuters xabar bermoqda.
“Hafsalam pir bo‘ldi, lekin u (Xitoy rahbari) bilan ko‘rishish niyatim bor”, — dedi Bayden, ehtimoliy uchrashuv tafsilotlariga aniqlik kiritmasdan.
O‘tgan hafta Xitoy Tashqi ishlar vazirligi Si Szinpinning G20 sammitiga safari rejalari bilan bog‘liq vaziyat hali noma’lum ekanini xabar qilgandi. Reuters agentligiga ko‘ra, Pekin sammitga Si o‘rniga bosh vazir Li Syanni yuboradi. Agentlik bilan gaplashgan tahlilchilar Xitoyning bu qaroriga Hindiston bilan raqobat sabab bo‘lishi mumkin, deb hisoblamoqda.
Oq uy Milliy xavfsizlik kengashining strategik aloqalar bo‘yicha koordinatori Jon Kirbi sentabr oyi boshida Bayden Si Szinpinni Nyu-Dehlida ko‘rishni istayotganini aytdi.
Financial Times gazetasining yozishicha, agar Xitoy rahbari haqiqatan ham ilk bor G20 sammitida ishtirok etishdan bosh tortsa, bu forumning jahon yetakchilari muhokamasi uchun global platforma sifatidagi mavqeyiga putur yetkazadi va Hindiston pozitsiyasiga zarba bo‘ladi.
Ma’lumot uchun Hindiston G20 ga 2022-yil 1-dekabrdan beri raislik qilmoqda. Tashkilot sammiti 9—10-sentabr kunlari Nyu-Dehlida bo‘lib o‘tadi. Unga G20 a’zoligiga kiruvchi barcha mamlakatlar va yana to‘qqizta davlat (Bangladesh, Misr, Ispaniya, Mavrikiy, Nigeriya, Niderlandiya, Birlashgan Arab Amirliklari, Ummon va Singapur) rahbarlari taklif etilgan. Avval Kreml matbuot xizmati Rossiya prezidenti Vladimir Putin Hindistonda bo‘lib o‘tadigan G20 sammitida qatnashmasligini ma’lum qilgandi. Rossiya delegatsiyasiga tashqi ishlar vaziri Sergey Lavrov boshchilik qiladi.
Izoh (0)