Ukraina prezidenti Vladimir Zelenskiy sentabr oyida Nyu-Dehlida bo‘lib o‘tadigan G20 sammitiga taklif qilinmadi. Bu haqda Hindiston tashqi ishlar vaziri Subramanyam Jayshankar Hindiston OAV uchun o‘tkazilgan brifingda ma’lum qildi.

Janob Jayshankarning so‘zlariga ko‘ra, G20 sammitida faqat sammit a’zolari, taklif etilgan mamlakatlar va tashkilotlar ishtirok etishi mumkin. Vladimir Zelenskiyning sammitda ishtirok etishi mumkinligi haqidagi savolga TIV rahbari salbiy javob berdi. Taklif etilganlar ro‘yxati Hindiston G20 ga raislik qilishni boshlagan paytda eʼlon qilingan. Sammitga taklifnoma Ukraina prezidentiga yuborilmagan.

“Bu ko‘rib chiqilayotgan masala emas. Shuningdek, biz bu masalani hech kim bilan muhokama qilmadik”, dedi Hindiston TIV rahbari.

Aprel oyida Ukraina tashqi ishlar vaziri o‘rinbosari Emine Japarova rasmiy Kiyev sentabr oyida bo‘lib o‘tadigan rasmiylar sammitiga Hindistondan taklif “kutayotganini” aytgan edi. Japarova xonimning so‘zlariga ko‘ra, “siyosiy muloqotni yanada kengaytirishga ta’sir qiladigan har qanday mumkin bo‘lgan tashriflar va aloqalar zarur”.