“Daryo”da “Buxoroda maktab direktorining o‘rinbosari kaltaklandi. Jabrlanuvchi shifoxonaning jonlantirish bo‘limiga yotqizilgani aytilmoqda” sarlavhali maqola e’lon qilingandi. Vobkent tumani hokimligi mazkur holatga aniqlik kiritdi.
2023-yilning 31-avgust kuni soat 10:00 atrofida Vobkent tumanidagi 5-umumiy o‘rta ta’lim maktabining oliy toifali jismoniy tarbiya fani o‘qituvchisi 1974-yilda tug‘ilgan fuqaro E.U. maktab direktorining o‘quv ishlari bo‘yicha o‘rinbosari 1975-yilda tug‘ilgan fuqaro G.Sh. bilan maktabda dars soatlarini dars jadvaliga joylashtirish masalasida tortishib qolib, noroziligi tufayli uning yuz qismiga ikki marotaba urgan. Oqibatida direktor o‘rinbosari maktab hovlisida yiqilib tushib, bosh miyasi jarohatlangan. Bemorga tibbiy tez yordam ko‘rsatilib, hozirgi kunda Vobkent tuman markaziy kasalxonasining jonlantirish bo‘limida davolanmoqda, — deyiladi hokimlik munosabatida.
Qayd etilishicha, holat yuzasidan Vobkent tuman IIB Tergov bo‘limi tomonidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan.
Izoh (0)