Buxoro viloyatining Vobkent tumanidagi 5-sonli umumta’lim maktabida direktor o‘rinbosari boshqa o‘qituvchi tomonidan kaltaklandi. Jabrlanuvchi shifoxonaga yotqizilgan. Bu haqda “Daryo”ga bildirgan manbaga ko‘ra, o‘qituvchi shifoxonaning jonlantirish bo‘limida qolmoqda.
Buxoro viloyat IIB axborot xizmati rahbari Shuhrat Jalolov “Daryo” so‘roviga javoban, voqeani tasdiqladi. Va holat yuzasidan jinoyat ishi qo‘zg‘atilganini ma’lum qildi.
Qayd etilishicha, maktab direktorining o‘rinbosari jismoniy tarbiya o‘qituvchisi tomonidan kaltaklangan.
Voqeaga aynan nima sabab bo‘lgan. Bu haqda menda axborot yo‘q. Lekin voqea yuzasidan Vobkent tuman IIB Tergov bo‘limi tomonidan Jinoyat kodeksining 104-moddasi (qasddan badanga og‘ir shikast yetkazish) bilan jinoyat ishi qo‘zg‘atilgan, — deydi viloyat IIB axborot xizmati rahbari Shuhrat Jalolov.
Manbaning qo‘shimcha qilishicha, maktabning jismoniy tarbiya o‘qituvchisi boks bilan shug‘ullangan bo‘lgan.
Jismoniy tarbiya o‘qituvchisi U.E. bokschi bo‘lgan. Dars taqsimotidagi kelishmovchilik sabab, u direktorning o‘quv ishlari bo‘yicha o‘rinbosarini kaltaklagan. O‘qituvchining ahvoli og‘ir. Viloyat prokuroriga o‘qituvchilar futbolda janjallashib qolishgan deb, ma’lumot kiritishgan, — deydi manba.
Izoh (0)