“Nikoh taqiqlanmadi, uni mustahkamlash uchun tartibga solinyapti” — Alisher Qodirov

Oliy Majlis Qonunchilik palatasining 5-sentabr kuni bo‘lib o‘tgan majlisida “O‘zbekiston Respublikasining Jinoyat kodeksiga va O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida”gi qonun loyihasi ko‘rib chiqilib, qabul qilingandi. Deputat Alisher Qodirov kiritilayotgan qo‘shimchalar jamoatchilik tomonidan keng muhokama qilinayotgani sabab, bu borada o‘z fikrlarini bildirib o‘tdi.

Taklif etilayotgan qonun loyihasi bilan, xususan, ikki yoki undan ortiq xotin bilan er-xotin bo‘lib yashashni targ‘ib qilganlik, xotin-qizlar va erkaklar teng huquqliligini ochiqdan-ochiq inkor etganlik uchun, shuningdek, jamoat joylarida shaxsini identifikatsiya qilish imkonini bermaydigan darajada yuzini to‘sgan holda bo‘lganlik uchun ma’muriy javobgarlik belgilanmoqda.

“Bu cheklovlar bilan jamiyatimizning qadrli mezonlarini himoya qilishga umid qilyapmiz. Oila, ayol, avrat, nikoh, farzand… hammamiz uchun, juda qadrli mezonlar! Bugungi ahvolimizga qarang! Kim qadrli mezonlarimizni xavf faktorlariga aylantirib yuboryapti!?

Masalan, dinimizda ayol kishining yuzi avrat emas, lekin e’tiqodni niqob qilib, yuzini tamoman yopib olgan “maqsadi nomaʼlum”, burqa kiyib olgan erkaklar qo‘lga tushdi, ular kimlar va maqsadlari nima? Avratni yopib yurish shart, lekin yuzingni ochib yur, Yaratgan yuzni avrat qilmadiku? Jamiyat, qolaversa yaqinlarimizni xavfsizligi uchun bunga eʼtibor bermaslik mumkinmi?”, — deydi deputat.

Uning ta’kidlashicha, nikoh birinchi navbatda majburiyat. Nikoh o‘qitib olib, uchta-to‘rttalab farzandni ko‘chaga tashlab ketayotgan erkaklar ko‘payib ketdi. Qonunchilikka kiritilayotgan qo‘shimchalar bilan nikoh taqiqlanmadi, uni mustahkamlash uchun tartibga solinyapti.

“Davlatga ko‘rinmaydigan, qonunga asosan yordam berish mumkin bo‘lmagan behujjat ayollar, bolalar keskin ortib ketdi, bu ketishda nima bo‘ladi?! Nikoh, oila, farzand shunchalar beqadr bo‘ldimi? Nikoh taqiqlanmadi, uni mustahkamlash uchun tartibga solinyapti: avval ro‘yxatdan o‘t, davlat har bir fuqaroni hisobini bilishi kerak!” — deydi Alisher Qodirov.

U aliment to‘lamay yuradigan erkaklar haqida ham to‘xtalib o‘tdi.

“Reklama birinchi bo‘lib qorni ochga taʼsir qilganidek, bitta oilani eplash qo‘lidan kelmagan ‘qahramonlar’, dinimizda belgilangan aniq va juda og‘ir shartlar va majburiyatlarga qaramay, bir kalla qand bilan nikoh o‘qitib olib, g‘o‘ddayib alimentdan qochib yurishibdi. Bu nikohga isnod, ayolni ho’rlash emasmi!? Farosat va diniy bilimi borlar tushunadigan cheklovni taqiq deb baqirayotganlar aynan shu g‘o‘dayganlar bo‘lib chiqsa hayron bo‘lmayman”, — deb qayd etdi Alisher Qodirov.

Oliy Majlis Qonunchilik palatasi deputati nega kamsitishlarga jazo kuchayishi kerakligini ham tushuntirdi.

“E’tiqod sababli kamsitish kabi sovet kasalidan qutilayapmiz, lekin milliy, etnik, ‘ko‘pchilik-ozchilik’ niqobini kiyib olib, qolganlarni kamsitish, og‘ziga urish, provokatsiya qilish, yo‘q joyda nizo, adovat qo‘zg‘atishning maqsad-oqibatlari haqida soatlab yozish mumkin. Bunga yo‘l qo‘ymaslik uchun huquqiy asos yaratilmoqda. Oson bo‘ladimi huquqiy baho? Albatta yo‘q, lekin qarab turmoqchi emasmiz. Amaliyot xato ko‘rsatsa, tuzatiladi, tahlillar to‘xtatilmaydi”, — dedi u.

Alisher Qodirovning bildirishicha, Qonunchilik palatasida xalq, millat, davlat, qadriyatlar haqida qarorlar yetmish marta o‘lchanadi, bu muhim qoida.

“Albatta yozib, hammasini tushuntirish qiyin, ayniqsa o‘jarlik bilan ko‘zini ochishni rad etayotganlarga!  Lekin, bir narsani aniq aytaman, qonunlar ishlanayotganida mutaxassislar, soha bilimdonlari bilan maslahat qilinadi. Siz tushunmayapsiz degani, xato degani emas! Muammolarni muhokama qilishni o‘rganishimiz kerak.

Gohida, hammaga ham yoqmaydigan, lekin hamma uchun zarur qarorlar ham qabul qilinadi, buni hammaga tushuntirib bo‘lmaydi… Bir-birimizni asrashni o‘rganmasak el bo‘lolmaymiz”, — dedi deputat.