Rossiya raketalarini ishlab chiqaruvchisi zaharlanishdan vafot etdi

Professor, texnika fanlari doktori Vitaliy Melnikov avgust oyi oxirida 77 yoshida vafot etdi. Bu haqda “Moskovskiy komsomolets” xabar berdi.

Professor 11-avgust kuni shifoxonaga yotqizilgan va 30-avgust kuni vafot etgan. Dastlabki versiyaga ko‘ra, u iste’mol qilish taqiqlangan qo‘ziqorinlardan zaharlangan, uning hayotini saqlab qolishning iloji bo‘lmagan.

Melnikov Roskosmosning raketa ishlab chiqarishiga rahbarlik qilgan, universitetda dars bergan, 300 ga yaqin ilmiy maqolalar muallifi va NASA bilan hamkorlikda ishtirok etgan. 

Jurnalistlar 9-avgust kuni professor Mitishchi tumanidagi o‘rmonga qo‘ziqorin terish uchun borganini aniqladi. 10-avgust kuni tushdan keyin professor dachasida qo‘ziqorinlarni qaynatib, kechqurun ularni iste’mol qilgan.

U dachada yolg‘iz bo‘lgan, qarindoshlari bu vaqt Moskvada edi. Keyinchalik olimning salomatligi yomonlashib, Moskvaga jo‘nab ketgan. Unda ovqatdan zaharlanishning barcha belgilari qayd etilgan, biroq tez yordam ertalab chaqirilgan.

Og‘ir ahvolda u Sklifosovskiy nomidagi ilmiy-tadqiqot institutining toksikologiya bo‘limiga yotqizilgan. 20 kun davomida shifokorlar uni saqlab qolishga harakat qilgan, ammo bemorning buyragi ishlamay qolgan va ahvoli kundan kunga yomonlashgan. 30-avgust kuni Melnikov o‘limi haqida uning oilasiga xabar qilingan.