Rossiyaning Vladimir viloyati qonunchilik majlisi deputati Pavel Antov 65 yoshida vafot etdi. Bu haqda qonunchilik majlisi saytida xabar berildi. “TASS” o‘z manbalariga tayanib yozishicha, deputat Hindistonda dam olayotgan paytida halok bo‘lgan
Hindistonning NDTV telekanali 25-dekabr kuni Pavel Antom ismli 65 yoshli rossiyalikning o‘limi haqida xabar berdi. U Odisha shtatida mehmonxona derazasidan tushib ketgani aytilmoqda, u yerda to‘rt kishilik sayyohlik guruhi tarkibida hordiq chiqarayotgan bo‘lgan.
Hindiston politsiyasi ofitseri NDTV’ga ma’lum qilishicha, u o‘z joniga qasd qilgan bo‘lishi mumkin. Uning so‘zlariga ko‘ra, “Pavel Antom”ning vafotidan ikki kun avval uning yo‘ldoshlaridan biri o‘sha mehmonxonada o‘lik holda topilgan, uni NDTV Vladimir Bidenov deb atamoqda.
Vladimirning “Zebra TV” nashri yozishicha, gap Antovning do‘sti, Rossiyaning Yoshkar-Ola shahridan 61 yoshli tadbirkor Vladimir Bidanov haqida bormoqda.
Rossiyaning Kalkuttadagi bosh konsuli Aleksey Idamkin “RIA Novosti”ga ma’lum qilishicha, Odisha shtati politsiyasi va Kalkuttadagi bosh konsulxona ikki rossiyalikning Hindistonda vafot etishi bilan bog‘liq voqeada shubhali hech narsa ko‘rmayapti. Uning so‘zlariga ko‘ra, birinchi marhumning ishi bo‘yicha surishtiruv allaqachon yakunlangan, uning jasadi esa krematsiya qilingan (kuydirilgan).
Pavel Antov — “Vladimirskiy standart” yirik go‘sht va kolbasa mahsulotlarini ishlab chiqaruvchi korxona asoschisi. Vladimir viloyati qonunchilik majlisiga 2018-yilda “Yagona Rossiya” partiyasidan saylangan.
2018-yilda Forbes uning daromadini 10 milliard rublga baholagan va uni o‘zining rossiyalik eng boy davlat mansabdorlari reytingida birinchi o‘ringa joylashtirgan edi.
Izoh (0)