Moskvada 22-iyul kuni tadbirkor va yirik IT-kompaniya “IKS Xolding” rahbari Anton Cherepennikov 40 yoshida vafot etdi. O‘limning dastlabki sababi yurak xuruji ekani aytilmoqda. Bu haqda “RBK” xabar berdi.
Anton Cherepennikov 1983-yil 7-mayda Moskvada tug‘ilgan. U bolaligidan video o‘yinlar ishqibozi bo‘lgan, 15 yoshida kompyuter klublariga borishni boshlagan. Bauman nomidagi Moskva davlat texnika universitetining Axborot xavfsizligi bo‘limida o‘qigan. 2008-yilda Moskva davlat qurilish universitetini tamomlagan.
Tadbirkor ikki marta turmush qurqan. Birinchi turmushidan Antonning bir qizi va bir o‘g‘li bor. Cherepennikov ajralish sababi biznes va ko‘p vaqtni oladigan boshqa loyihalar ekanini ta’kidlagan. U 2015-yildan beri ikkinchi turmush o‘rtog‘i bilan yashagan.
Cherepennikov turli yillarda Rossiyadagi eng muvaffaqiyatli yosh tadbirkorlar ro‘yxatiga kiritilgan. 2023-yil fevral oyi oxirida Cherepennikov AQSHning qora ro‘yxatiga, keyinroq esa Ukraina sanksiyalari ro‘yxatiga kiritilgan.
O‘yin biznesi va Alisher Usmonov bilan aloqa
2003-yilda Cherepennikov “Virtus.pro” kibersport kompaniyasiga asos soldi. U Counter-Strike bo‘yicha o‘yinchilar jamoasidan iborat bo‘lgan, keyinchalik unga boshqa o‘yinlar qo‘shilgan.
2015-yilda Anton Cherepennikov o‘sha paytda NAVI klubiga egalik qilgan Aleksandr Koxanovskiy bilan birgalikda ESforce kibersport xoldingini yaratdi, unga bir qator boshqa kibersport aktivlari qatorida “Virtus.pro” klubi ham kiradi.
O‘sha paytda milliarder Alisher Usmonov Virtus Pro kibersport jamoasiga 100 million dollar sarmoya kiritdi. Keyinchalik, asosiy aksiyadorlari Usmonov tuzilmalari bo‘lgan Mail.ru Group biznesni 100 million dollarga sotib oldi.
Anton Cherepennikovning biznesi ko‘pincha Alisher Usmonov bilan bog‘liq edi — u ularni milliarderdan sotib olgan yoki aktivlarini unga sotgan. Biroq 2019-yilda “Vedomosti” nashriga bergan intervyusida Cherepennikov Usmonov bilan ishlaganidan g‘ururlansa-da, uni “Usmonovning kibersport bo‘yicha hamkori” deb doimiy tilga olishlaridan juda charchaganini aytgan.
Kibersport biznesining rivojlanishi bilan bir qatorda, Cherepennikov CORM kompaniyalaridan iborat “Sitadel” xoldingini tuzdi.
Uning birinchi xaridi MFI Soft kompaniyasi bo‘lib, u CORM’ning eng yirik yetkazib beruvchisi hisoblanadi. Bitim summasi 10 milliard rubldan ortiqni tashkil etdi, buning uchun pul Cherepennikovga USM Group (Alisher Usmonovga tegishli) tuzilmalari tomonidan qarz sifatida berilgan.
Xariddan bir yil o‘tgach, 2018-yil boshida Cherepennikov ushbu kreditni Sberbankda qayta ro‘yxatdan o‘tkazdi. Kreditning bankda qayta rasmiylashtirilishini Cherepennikovning Usmonovdan “ko‘proq mustaqil” bo‘lish istagi bilan izohlanadi.
Biroq, Usmonov va Cherepennikov tuzilmalari o‘rtasidagi yaqin hamkorlik davom etdi.
2018-yilning mart oyida Usmonov tomonidan boshqariladigan MegaFon operatori birinchilardan bo‘lib “Sitadel” tomonidan ishlab chiqilgan “Yarovaya qonuni” doirasida ma’lumotlarni yig‘ish va saqlash tizimlarini sinovdan o‘tkazish haqida xabar berdi.
Keyin Usmonov jamoasining asosiy top-menejerlaridan biri Sergey Soldatenkov MegaFon bosh direktori lavozimini tark etgach, darhol uning direktorlar kengashiga qo‘shildi.
Shu bilan birga, Cherepennikov boshqa kompaniyalar guruhini — “IKS Holding”ni tashkil qila boshladi. Hozir xolding 30 ga yaqin texnologik kompaniyalarni, jumladan “KNS Grup” (Yadro brendi), “Byuro 1440” (global sun'iy yo'ldosh turkumini yaratishni rejalashtirmoqda) va boshqalarni birlashtiradi.
2020-2021 yillarda “USM Telecom”, IKS Holding egasi bo‘lgan, uning 80 foizi, o‘z navbatida, Alisher Usmonovning USM Group kompaniyasiga tegishli edi. 2022 yil boshida USM “IKS Holding”ni Anton Cherepennikovga sotdi. Bitim summasi oshkor qilinmadi.
Putin elitasining vakili
Britaniyaning Daily Mirror nashri Rossiya muxolifatidagi manbasiga tayanib, Cherepennikov “mutlaqo Putin repressiyalarining asosiy quroli” bo‘lganini, buning uchun u bir paytlar AQSH sanksiyalari ostida qolganini yozadi.
“Uning o‘ldirilishini inkor etib bo‘lmaydi, chunki Rossiyadagi davlat xavfsizlik apparati muvaffaqiyatsiz urushdan umidsizlanib bormoqda”, — dedi manba.
Shuningdek, britaniyaliklar Cherepennikov Putin elitasining so‘nggi ikki kun ichida vafot etgan ikkinchi vakili ekanini ta’kidlamoqda. Bungacha sobiq hukumat amaldori, milliarder oligarx Igor Kudryakov vafot etgandi. U Moskvadagi kvartirasida o‘lik holda topilgan.
Izoh (0)