Россия ракеталарини ишлаб чиқарувчиси заҳарланишдан вафот этди

Профессор, техника фанлари доктори Виталий Мелников август ойи охирида 77 ёшида вафот этди. Бу ҳақда “Московский комсомолец” хабар берди.

Профессор 11 август куни шифохонага ётқизилган ва 30 август куни вафот этган. Дастлабки версияга кўра, у истеъмол қилиш тақиқланган қўзиқоринлардан заҳарланган, унинг ҳаётини сақлаб қолишнинг иложи бўлмаган.

Мелников Роскосмоснинг ракета ишлаб чиқаришига раҳбарлик қилган, университетда дарс берган, 300 га яқин илмий мақолалар муаллифи ва NASA билан ҳамкорликда иштирок этган. 

Журналистлар 9 август куни профессор Митишчи туманидаги ўрмонга қўзиқорин териш учун борганини аниқлади. 10 август куни тушдан кейин профессор дачасида қўзиқоринларни қайнатиб, кечқурун уларни истеъмол қилган.

У дачада ёлғиз бўлган, қариндошлари бу вақт Москвада эди. Кейинчалик олимнинг саломатлиги ёмонлашиб, Москвага жўнаб кетган. Унда овқатдан заҳарланишнинг барча белгилари қайд этилган, бироқ тез ёрдам эрталаб чақирилган.

Оғир аҳволда у Склифосовский номидаги илмий-тадқиқот институтининг токсикология бўлимига ётқизилган. 20 кун давомида шифокорлар уни сақлаб қолишга ҳаракат қилган, аммо беморнинг буйраги ишламай қолган ва аҳволи кундан кунга ёмонлашган. 30 август куни Мелников ўлими ҳақида унинг оиласига хабар қилинган.