Shavkat Mirziyoyev orden va medallar bilan taqdirlanganlarga mukofotlarni topshirdi. Bu haqda Prezident matbuot xizmati xabar berdi.
Unga ko‘ra, Shavkat Mirziyoyevning farmonlariga muvofiq, O‘zbekiston Respublikasi mustaqilligining o‘ttiz ikki yilligi munosabati bilan bir guruh yurtdoshlar faxriy unvonlar, orden va medallar bilan, chet ellik investorlar “Do‘stlik” ordeni bilan mukofotlangan edi. 30-avgust kuni Ko‘ksaroyda ushbu mukofotlarni topshirish marosimi bo‘ldi.
Davlat rahbari marosim ishtirokchilarini avvalo Mustaqillik bayrami bilan tabriklab, tilaklarini izhor etdi. Bu davrda mamlakat katta taraqqiyot yo‘lini bosib o‘tgani, barcha sohalarda o‘zgarishlar bo‘layotgani taʼkidlandi.
“Xalq manfaatini taʼminlash, inson qadrini ulug‘lashga qaratilgan harakatlarni davom ettirish maqsadida “O‘zbekiston-2030” strategiyasini ishlab chiqdik. Uning loyihasini muhokamaga qo‘yganimizda 1 milliondan ko‘p takliflar kelib tushdi. Bu nimadan dalolat? Xalqimiz befarq emas. Yo‘nalishlarimizni, kamchiliklarimizni ko‘rsatib beryapti. Bu biz uchun “yo‘l xaritasi”. Davlatga eng katta hakam – xalq”, — dedi prezident.
Bu muhim hujjatda Vatan mustaqilligini va tinchligini asrash, kuchli iqtisodiyotni shakllantirish, xalq hayotini obod va farovon qilish, farzandlarni barkamol etib tarbiyalash vazifalari belgilangan.
“Sodda qilib aytganda, bizning maqsadimiz bitta: u ham bo‘lsa, Yangi O‘zbekistonda xalqimiz yayrab ishlaydigan, hayotdan rozi bo‘lib, yayrab yashaydigan davlat qurishdan iborat”, – dedi Shavkat Mirziyoyev.
Buning zamini, avvalo, tinchlik, barqarorlik. Xalq buning qadriga yetib, intilish, mehnat ruhida yashamoqda. Yangi-yangi zamonaviy sanoat korxonalari ishga tushirilmoqda. Ilm-fan, texnologiyalar, xizmat ko‘rsatish borasida muhim natijalar qo‘lga kiritilmoqda. 2022-yil yakunlariga ko‘ra, mamlakatning iqtisodiy o‘sish ko‘rsatkichi 5,7 foizni tashkil etdi.
Bugungi kunda mamlakatning barcha hududlarida shinam uy-joylar, yo‘l va ko‘priklar, shifoxonalar, bog‘cha, maktab, madaniyat va sport markazlari bunyod etilmoqda. Tabiat qiyinchiliklariga qaramasdan, qishloq xo‘jaligi ekinlaridan mo‘l hosil olinib, oziq-ovqat xavfsizligini, xalq dasturxoni to‘kinligini taʼminlashga erishilmoqda. Shular haqida gapirar ekan, prezident ulug‘ mutafakkir Alisher Navoiyning “Bu dunyoda insonlarning dard-u tashvishlarini o‘ylab yashash — odamiylikning eng oliy mezonidir”, degan so‘zlarini keltirdi.
Buning ifodasini aholining ijtimoiy himoyaga muhtoj qatlamiga, jumladan, keksa avlod vakillari, ayollar va yoshlarga g‘amxo‘rlikda yaqqol ko‘rish mumkin. Kam taʼminlangan oilalarni qo‘llab-quvvatlash, sifatli taʼlim berish, zamonaviy kasb-hunarlarga o‘rgatish, infratuzilmani yaxshilash hisobidan respublikada kambag‘allik darajasi sezilarli pasaymoqda. Davlat rahbari mahallalardagi ishlarni, odamlarning faolligini qayd etdi.
“Biz birinchi kundan xalq ichiga kirib boryapmiz. Ko‘p tizimlarni mahallaga tushiryapmiz. Nimaga? Mahalla — davlatchiligimizning zamini. Agar 9 ming 400 ta mahalla tinch bo‘lsa, yurtimiz tinch bo‘ladi. Investitsiya ham, taʼlim-tarbiya, qurilish, obodonlashtirish ham mahallada bo‘lsa, qanday o‘zgarish bo‘ladi?! Mana, “Ochiq budjet” orqali odamlar o‘z muammosini olib chiqib, ovoz berib, o‘zi nazorat qilyapti. Shuning uchun mahalla tizimini rivojlantirish bo‘yicha ishlarimizni qatʼiy davom ettiramiz”, — dedi Shavkat Mirziyoyev.
Prezident marosimga yig‘ilganlarni nomma-nom tilga olib, davlat mukofotlari bilan tabrikladi. Ularni Yangi O‘zbekistonning chinakam bunyodkorlari sifatida qadrlashini taʼkidlab, fidokorona mehnati, yosh avlodga ibrati uchun minnatdorlik bildirdi.
“Baxt nima o‘zi? Farzandlar bag‘rida sog‘-salomat yurish, oilada, el-yurtda aziz bo‘lish, halol qilgan mehnatingning qadrini ko‘rish. Butun xalqimiz sizlar bilan faxrlanadi, sizlarga havas bilan qaraydi. Ilohim, mana shunday obro‘, mana shunday hurmat-eʼtibor sizlarni hech qachon tark etmasin”, – dedi Shavkat Mirziyoyev.
Shundan so‘ng, mukofotlanganlarga faxriy unvon, orden va medallar tantanali ravishda topshirildi. Maʼlumki, prezident tashabbusi bilan “Imom Buxoriy” ordeni taʼsis etilgan. Yurt va mintaqada muqaddas islom dinini asrash, ilmiy merosni o‘rganish va musulmonlarga yetkazish yo‘lida maʼnaviy jasorat ko‘rsatib yashagan ikki buyuk vatandosh, marhum muftiylar – shayx Ziyovuddinxon ibn Eshon Boboxon hamda shayx Muhammad Sodiq Muhammad Yusuf hazratlari “Oliy Darajali Imom Buxoriy” ordeni bilan mukofotlangan edi. Tadbirda ularning farzandlariga ushbu nishon topshirildi.
El-yurtda hurmatga sazovor nuroniylar, davlat xizmatchilari, olim va pedagoglar, tadbirkorlar, sanoatchilar, ijodkor va sanʼatkorlar, harbiylar, sportchi va murabbiylar mukofotlarni qabul qilib oldi. Prezident ularni tabriklab, dil so‘zlari va tilaklarini aytdi.
“Bugun men sizlarning ochiq chehrangiz, baxtiyor ko‘zlaringizni, sizlardagi baland ruhni ko‘rib, ochig‘ini aytsam, go‘yoki o‘zim ham mukofot olgandek xursand bo‘lib turibman. Niyatim: ko‘ksingizga yarashib turgan mana shu yuksak unvon va nishonlar sizlarga yangi-yangi kuch-g‘ayrat baxsh etsin”, – dedi prezident.Mukofotlanganlar yuksak eʼtibor uchun minnatdorlik bildirib, xalqqa ezgu tilaklar bildirdi.
Izoh (0)