So‘rovnoma: O‘zbekiston aholisining 74,1 foizi o‘z hayotidan juda mamnun

“Ijtimoiy fikr” respublika jamoatchilik fikrini o‘rganish markazi tomonidan O‘zbekiston fuqarolari o‘z hayotidan qoniqadimi, mazmunidagi so‘rov o‘tkazildi, deya xabar berdi O‘zA.

 

 

 

 

Maʼlum qilinishicha, so‘rovda qatnashganlarning 74,1 foizi hayotdan va ishlarning hozirgi holatidan juda mamnun. Qolgan 13,7 foiz odamlar hayotidan qoniqishlarini aytgan. Har o‘ninchi respondent “qisman qoniqishini” bildirgan.

So‘rovnomada qatnashgan o‘zbekistonliklar o‘zlarining o‘tgan yildagi moddiy ahvoli va moliyaviy holatini baholay turib, fuqarolarning aksariyati – 66,1 foizi yaxshilanishlarni qayd etgan. Qolgan 27,5 foiz fuqarolar u avvalgidek yaxshi darajada qoldi deb hisobladi.

Ijtimoiy so‘rovnoma natijalariga ko‘ra, o‘zbekistonliklarning siyosiy-ijtimoiy faolligi ham ortgan. Ular mamlakatning siyosiy, iqtisodiy va ijtimoiy rivojlanishi haqida ijobiy fikrda va o‘zgarishlarni o‘z hayotida sezayotganini bildirgan.

Avvalroq deputet Alisher Qodirov Oliy Majlis yig‘ilishida ko‘p deputatlarning joylarda olib borgan tahlillari natijasida odamlarning shukronalik kayfiyatida salbiy o‘zgarishlar borligi aniqlanganini aytgandi.

“Ijtimoiy fikr” markazi 2016-yilda o‘tkazgan so‘rovda o‘zbekistonliklarning 96 foizi o‘z oilasini mustahkam va baxtli hisoblashi keltirilgandi. Tashkilotning 2017-yildagi so‘rovida esa mamlakat aholisining 97,9 foizi o‘zini qonun himoyasida deb bilishi bildirilgan.