Yurtimizda jami 49 turdagi oftalmologik kasalliklarni davolash bo‘yicha 172 turda tibbiy xizmatlar ko‘rsatishga erishildi. Bu haqda Sog‘liqni saqlash vazirligi matbuot xizmati “Daryo”ga maʼlum qildi.
Taʼkidlanishicha, 2018—2022-yillarda Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazi 4,5 mln dollar qiymatidagi 145 ta yuqori texnologik tibbiy uskunalar bilan ta’minlangan.
“Ko‘z mikroxirurgiyasi markazida dunyo andozalariga mos ravishda jarrohlik faolligi 99,4 foizga yetkazildi.
O‘tgan davr mobaynida markazning deyarli barcha filiallarida katarakta jarrohligining “Oltin standarti” katarakta fakoemulsifikatsiya, ko‘z olmasining oldi va orqa qismidagi barcha turdagi lazer jarrohliklari usullari, optik kogerent tomografiya (OKT), ultratovushli biomikroskopiya (UBM) diagnostika usullari keng joriy qilindi.
Samarqand, Qoraqalpog‘iston va Buxoro filiallarida ilk bora keratoplastika va vitreoretinal jarrohlik usullari amaliyotga joriy etildi. Kuni kecha, yaʼni 2023-yil 25-avgust kunida Navoiy viloyati filialida ilk bora ko‘z olmasining oldi va orqa qismidagi lazer jarrohlik usullari va asoratli katarakta sunʼiy ko‘z gavharini ko‘z sklerasiga tikish amaliyoti bajarildi”, — deyiladi vazirlik axborotida.
Qo‘shimcha qilinishicha, markazda respublikada yagona bo‘lgan diagnostika va davolash sifatini nazorat qilish guruhi (davolash nazorati guruhi) tashkil etilgan bo‘lib, davolangan bemorlarga ko‘rsatilgan tibbiy yordam sifatini baholaydi.
Davolangan bemorlarning soni va sifatiga baho berish bo‘yicha maxsus kompyuter dasturi, xodimlarning mehnatiga qarab ish haqini ishlab chiqish bo‘yicha kompyuter dasturi tizimi mavjud. Elektron kasallik tarixi ishlab chiqilgan va tatbiq etilgan.
Maʼlumot uchun, prezident Shavkat Mirziyoyevning 2017-yilda Surxondaryo viloyatiga tashrifida Respublika oftalmologiya sohasida telemeditsinani tashkillashtirish topshirig‘iga binoan 2019-yilda jami 120 ming AQSH dollari miqdoridagi mablag‘ evaziga jami 14 ta maxsus raqamli biomikroskop (tirqishli lampa) hududlarga yuborilgan. Shuningdek, Isuzu rusumidagi avtobuslar negizida 13 dona mobil poliklinika tashkil etildi va 5 xil zamonaviy oftalmologik uskunalar bilan jihozlandi.
Izoh (0)