AQSH Vashington hayvonot bog‘idagi pandalar yil oxirida Xitoyga qaytarib yuborilishini istisno qilmaydi, dedi Oq uy matbuot kotibi Karin Jan-Pyer brifingda.
“Hammamiz pandalarni yaxshi ko‘ramiz. Bu masalani prezident bilan muhokama qilganim yo‘q”, — dedi u AQSH prezidenti Jo Bayden Xitoy rahbari Si Szinpindan pandalarning qolishini so‘raydimi yoki yo‘qligi haqidagi savolga javoban.
Hayvonlar 7-dekabrgacha Xitoyga qaytarilishi kerak.
1984-yildan xorijiy davlatlar Xitoy pandalarini 10 yilga ijaraga olishi mumkin bo‘ldi, bir juft panda uchun Pekinga 250 ming dollardan bir million dollargacha haq to‘lanadi. Xitoy tomonidan xorijiy davlatlar bilan munosabatlar o‘rnatishda qo‘llanadigan xalq diplomatiyasining bunday usuli panda diplomatiyasi deb ataladi.
Ijara muddati tugagach, hayvonlar Xitoyga qaytarilishi kerak. Bundan tashqari, agar ko‘chirilgan pandalar bolalasa, to‘rt yildan keyin, ya’ni kichik pandalar jinsiy yetilgach, ularni ham Xitoyga yuborish kerak bo‘ladi.
Mey Syan va Tyan Tyan laqabli bir juft panda 2000-yilda Xitoy yovvoyi tabiat assotsiatsiyasi o‘rtasidagi kelishuv doirasida Vashington hayvonot bog‘iga keltirilgan edi. Dastlab jonivorlar tadqiqot va naslchilik dasturi uchun o‘n yil qolishi rejalashtirilgan, ammo keyin Xitoy bilan kelishuv bir necha bor uzaytirilgan, deb ta’kidlaydi CBS News.
Urg‘ochi panda 2020-yil 21-avgust kuni Syao Si Szi laqabli o‘g‘il bola pandani dunyoga keltirdi, o‘sha yili uchala panda ham 2023-yil oxirigacha AQSHda qolishi haqida shartnoma imzolandi.
Izoh (0)