Toshkent viloyatida beshta holatda 413 million so‘mdan ziyod tabiiy gaz va elektr energiyasidan noqonuniy foydalanilgani aniqlandi, deb xabar beradi Energetika vazirligi matbuot xizmati.
Qayd etilishicha, so‘nggi to‘rt kunda “O‘zenergoinspeksiya” tomonidan huquqni muhofaza qiluvchi organlar va elektr hamda gaz taʼminoti korxonalari mutaxassislari bilan hamkorlikda Toshkent viloyatida o‘tkazilgan nazorat tadbirlari davomida tabiiy gaz va elektr energiyasidan noqonuniy foydalanish holatlari aniqlangan. Xususan:
- Zangiota tumanida fuqaro I.SH.ga qarashli ferma o‘zboshimchalik bilan gaz tarmog‘iga noqonuniy ravishda ulangani natijasida davlat manfaatlariga 130 million 86 ming so‘m (130 ming 86 metr kub);
- Zangiota tumani, “Obod to‘qimachi” MFYda fuqaro A.B.ga qarashli suv nasosi o‘zboshimchalik bilan elektr tarmog‘iga ulanib, davlat manfaatlariga 88 million 772 ming so‘m (183,9 ming kVt/soat);
- Zangiota tumani, “To‘qimachi” MFYda fuqaro E.X.ga qarashli “Agro Asomiddin Al Mardon” MCHJda elektr energiyasidan noqonuniy foydalanilishi natijasida davlat manfaatlariga 32 million 580 ming so‘m (86,4 ming kVt/soat);
- Chirchiq shahrida joylashgan “G‘isht zavod” xususiy korxonasi tomonidan elektr hisoblagichga tashqi taʼsir ko‘rsatish natijasida davlat manfaatlariga 85 million 997 ming so‘m (189,8 ming kVt/soat);
- Yuqori Chirchiq tumanida faoliyat yuritib kelayotgan yakka tartibdagi tadbirkor “B.N.N” elektr qurilmalarini o‘zboshimchalik bilan elektr tarmog‘iga ulab, davlat manfaatlariga 76 million 464 ming so‘m (169,9 ming kVt/soat) miqdorida zarar yetkazgan.
Dastlabki hisob-kitoblarga ko‘ra, mazkur beshta holatda davlat manfaatlariga yetkazilgan umumiy zarar miqdori 413 million 899 ming so‘m (130 ming 86 metr kub tabiiy gaz, 630 ming kVt/soat)ni tashkil etgan.
Hozirgi vaqtda aniqlangan holatlar yuzasidan huquqni muhofaza qiluvchi organlar tomonidan o‘rnatilgan tartibda surishtiruv ishlari olib borilmoqda.
O‘zbekistonda 2023-yilning 6 oyida elektr energiyasidan noqonuniy foydalanish tufayli 78,5 milliard so‘m, tabiiy gazdan noqonuniy foydalanish sababli esa 231 milliard 866 million so‘m zarar ko‘rilgan. Bundan oldin Buxoro shahrida faoliyat yuritib kelayotgan korxona elektr hisoblagichga tashqi taʼsir ko‘rsatishi natijasida tizimga 2 milliard so‘mlik zarar yetkazilgani to‘g‘risida xabar berilgandi.
Izoh (0)