Тошкент вилоятида бешта ҳолатда 413 миллион сўмдан зиёд табиий газ ва электр энергиясидан ноқонуний фойдаланилгани аниқланди, деб хабар беради Энергетика вазирлиги матбуот хизмати.
Қайд этилишича, сўнгги тўрт кунда “Ўзэнергоинспекция” томонидан ҳуқуқни муҳофаза қилувчи органлар ва электр ҳамда газ таъминоти корхоналари мутахассислари билан ҳамкорликда Тошкент вилоятида ўтказилган назорат тадбирлари давомида табиий газ ва электр энергиясидан ноқонуний фойдаланиш ҳолатлари аниқланган. Хусусан:
- Зангиота туманида фуқаро И.Ш.га қарашли ферма ўзбошимчалик билан газ тармоғига ноқонуний равишда улангани натижасида давлат манфаатларига 130 миллион 86 минг сўм (130 минг 86 метр куб);
- Зангиота тумани, “Обод тўқимачи” МФЙда фуқаро А.Б.га қарашли сув насоси ўзбошимчалик билан электр тармоғига уланиб, давлат манфаатларига 88 миллион 772 минг сўм (183,9 минг кВт/соат);
- Зангиота тумани, “Тўқимачи” МФЙда фуқаро Э.Х.га қарашли “Агро Асомиддин Ал Мардон” МЧЖда электр энергиясидан ноқонуний фойдаланилиши натижасида давлат манфаатларига 32 миллион 580 минг сўм (86,4 минг кВт/соат);
- Чирчиқ шаҳрида жойлашган “Ғишт завод” хусусий корхонаси томонидан электр ҳисоблагичга ташқи таъсир кўрсатиш натижасида давлат манфаатларига 85 миллион 997 минг сўм (189,8 минг кВт/соат);
- Юқори Чирчиқ туманида фаолият юритиб келаётган якка тартибдаги тадбиркор “Б.Н.Н” электр қурилмаларини ўзбошимчалик билан электр тармоғига улаб, давлат манфаатларига 76 миллион 464 минг сўм (169,9 минг кВт/соат) миқдорида зарар етказган.
Дастлабки ҳисоб-китобларга кўра, мазкур бешта ҳолатда давлат манфаатларига етказилган умумий зарар миқдори 413 миллион 899 минг сўм (130 минг 86 метр куб табиий газ, 630 минг кВт/соат)ни ташкил этган.
Ҳозирги вақтда аниқланган ҳолатлар юзасидан ҳуқуқни муҳофаза қилувчи органлар томонидан ўрнатилган тартибда суриштирув ишлари олиб борилмоқда.
Ўзбекистонда 2023 йилнинг 6 ойида электр энергиясидан ноқонуний фойдаланиш туфайли 78,5 миллиард сўм, табиий газдан ноқонуний фойдаланиш сабабли эса 231 миллиард 866 миллион сўм зарар кўрилган. Бундан олдин Бухоро шаҳрида фаолият юритиб келаётган корхона электр ҳисоблагичга ташқи таъсир кўрсатиши натижасида тизимга 2 миллиард сўмлик зарар етказилгани тўғрисида хабар берилганди.
Изоҳ (0)