USAID’ning O‘zbekistondagi missiyasiga yangi rahbar tayinlandi

Devid Xofman AQSH Xalqaro taraqqiyot agentligining (USAID) O‘zbekistondagi missiyasini yangi rahbari etib tayinlandi. Bu haqda agentlik o‘zining Facebook’dagi sahifasi orqali ma’lum qildi.

Qayd etilishicha, missiyaning yangi direktori Toshkentga yetib kelgan.

“Janob Xofman rahbarligida AQSH Xalqaro taraqqiyot agentligi O‘zbekiston hukumati tomonidan amalga oshirilayotgan islohotlar dasturini qo‘llab-quvvatlashda davom etadi”, — deyiladi xabarda.

Devid Xofman 4-avgust kuni USAID noibi Samanta Pauer, shuningdek, O‘zbekistonning AQSHdagi elchisi Furqat Sidiqov hamda AQSHning O‘zbekistondagi elchisi Jonatan Xenik (onlayn) guvohligida Vashingtondagi USAID bosh qarorgohida lavozimga kirishishdan oldin qasamyod qilgan edi.

Devid Xofman USAID tizimida 2009-yildan beri faoliyat yuritib keladi. U Kaliforniyada tug‘ilgan, bolalik yillarini Germaniyada o‘tkazgan. Stenfort universitetida dastlab xalqaro munosabatlar bo‘yicha, keyin esa fizika bo‘yicha bakalavr darajasini olgan. Shuningdek, u Berklidagi Kaliformiya universitetida siyosiy fanlar doktori (PhD) bo‘lgan.

AQSH Xalqaro taraqqiyot agentligining O‘zbekistondagi vakolatxonasi 2020-yilda ochilgan. Bungacha agentlikning O‘zbekistondagi vakolatxonasi Markaziy Osiyoda (Olmaotada) USAID missiyasining tarkibiga kirgan. Missiyaning birinchi direktori Mikaela Meredit edi.