O‘zbekistonda 2023/2024-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari bo‘yicha tanlov natijalari e’lon qilingani to‘g‘risida xabar berilgandi. 22-avgustdan test imtihonlari natijalaridan norozi bo‘lgan abituriyentlardan apellatsiya arizalarini qabul qilish boshlandi.
Test sinovlari natijasidan norozi bo‘lgan abituriyentlar apellatsiya arizalarini “my.uzbmb.uz” sayti orqali (abituriyentning shaxsiy kabinetida) onlayn tarzda yuborishi mumkin. Apellatsiya arizalari 31-avgustga qadar (10 kun) qabul qilinadi.
Abituriyent apellatsiya shikoyati berishi uchun test sinovida ishtirok etgan va test sinovidan chetlatilmagan bo‘lishi lozim.
Apellatsiya arizasini bergan abituriyentga uni ko‘rib chiqish sanasi va vaqti ko‘rsatilgan xabarnoma beriladi. Abituriyent aytilgan vaqtda shaxsini tasdiqlovchi hujjat, xabarnoma va abituriyent ruxsatnomasi bilan Bilimni baholash agentligiga kelishi kerak. Apellatsiya shikoyatlarini ko‘rib chiqish 24-avgustdan boshlanadi.
Oldinroq mandat saytidagi ochiq ma’lumotlarga ko‘ra, joriy yilda jami abituriyentlarning salkam yarmi (49,4 foiz) o‘tish balining eng quyi chegarasi bo‘lgan 56,7 balni ham to‘play olmagani aytilgandi. Ma’lum bo‘ldiki, 56,7 balldan kam to‘plagan abituriyentlarning 70,5 foizi avvalgi yillarda o‘qishni tugatganlar, 29,5 foizi joriy yilgi bitiruvchilar bo‘lgan.
Izoh (0)