Ўзбекистонда 2023/2024-ўқув йили учун олий таълим муассасаларининг бакалавриат таълим йўналишларига кириш тест синовлари бўйича танлов натижалари эълон қилингани тўғрисида хабар берилганди. 22 августдан тест имтиҳонлари натижаларидан норози бўлган абитуриентлардан апелляция аризаларини қабул қилиш бошланди.
Тест синовлари натижасидан норози бўлган абитуриентлар апелляция аризаларини “мй.узбмб.уз” сайти орқали (абитуриентнинг шахсий кабинетида) онлайн тарзда юбориши мумкин. Апелляция аризалари 31 августга қадар (10 кун) қабул қилинади.
Абитуриент апелляция шикояти бериши учун тест синовида иштирок этган ва тест синовидан четлатилмаган бўлиши лозим.
Апелляция аризасини берган абитуриентга уни кўриб чиқиш санаси ва вақти кўрсатилган хабарнома берилади. Абитуриент айтилган вақтда шахсини тасдиқловчи ҳужжат, хабарнома ва абитуриент рухсатномаси билан Билимни баҳолаш агентлигига келиши керак. Апелляция шикоятларини кўриб чиқиш 24 августдан бошланади.
Олдинроқ мандат сайтидаги очиқ маълумотларга кўра, жорий йилда жами абитуриентларнинг салкам ярми (49,4 фоиз) ўтиш балининг энг қуйи чегараси бўлган 56,7 бални ҳам тўплай олмагани айтилганди. Маълум бўлдики, 56,7 баллдан кам тўплаган абитуриентларнинг 70,5 фоизи аввалги йилларда ўқишни тугатганлар, 29,5 фоизи жорий йилги битирувчилар бўлган.
Изоҳ (0)