O‘zbekistonning Jidda shahridagi bosh konsulxonasi O‘zbekiston turizm infratuzilmasini rivojlantirishga xorijiy investitsiyalarni jalb qilish maqsadida Toif shahridagi yirik tadbirkorlardan biri bo‘lmish Yusuf Turkistoniy bilan uchrashuv o‘tkazdi. Bu haqda “Dunyo” agentligi xabar berdi.
Suhbat davomida Yusuf Turkistoniy O‘zbekistondagi biznesini kengaytirish harakatida ekanini maʼlum qilgan. Jumladan, ayni paytda u Farg‘ona vodiysida “Arablar shaharchasi” nomi ostida turistik dam olish maskanini barpo etishni rejalashtirmoqda.
Suhbatdoshning taʼkidlashicha, ushbu turistik maskanni Farg‘ona shahri va Chimyon sanatoriyasi o‘rtasidagi adirliklarda 15 gektar yer maydonda barpo etish mo‘ljallanmoqda. Loyihaning umumiy qiymati qariyb 3 million dollarni tashkil etadi. Shu munosabat bilan u 2023-yilning sentabrida O‘zbekistonga tashrif buyurishni rejalashtirgan.
May oyida Fransiya kompaniyasi Chimyonda umummavsumiy dam olish maskanini qurishi xabar qilingan edi. Iyunda bo‘lsa Toshkentning Shayxontohur tumanida 20,7 kilometr uzunlikdagi “Turizm halqasi” barpo etilishi ma’lum bo‘lgandi. Shu maqsadda respublika budjetidan Toshkent shahar mahalliy budjetiga 3 yil muddatga 100 milliard so‘m budjet ssudasi ajratiladi.
Izoh (0)