Toshkent shahri Mirzo Ulug‘bek tumanida joylashgan 51 xonali hovli auksion orqali 33,2 milliard so‘mga sotildi.
“E-auksion” ma’lumotlariga ko‘ra, umumiy maydoni 52 sotix bo‘lgan ushbu hovli ichidagi jihozlari, 135 turdagi tovar va moddiy boyliklar bilan sotilgan.
“Toshkent shahri, Mirzo Ulug‘bek tumani, Ravon ko‘chasi 50-uy, Mirzo Ulug‘bek tumani, Zaytun ko‘chasi 70-uy hududidan bugungi kunda bitta uy sifatida foydalanib kelinayotgani bois, har ikki uy bitta uy-joy sifatida va undagi mol-mulklar bilan birga elektron onlayn-auksion orqali sotuvga chiqarilmoqda”, — deyiladi savdo ma’lumotida.
Pishgan g‘ishtdan 2017-yilda qurilgan uy ikki qavatli bo‘lib, maydoni 2052,88 kvadrat metrni tashkil etadi. Shuningdek, hovlida gaz, suv, elektr ta’minoti va kanalizatsiya mavjud.
Obyektni elektron-onlayn auksionga qo‘yish uchun asos — O‘zbekiston Harbiy sudining 2021-yil 15-apreldagi 91-sonli ijro varaqasi hamda byuro inspektor S.Ahmedovning 2021-yil 20-dekabrdagi qarori. Uy “Mob group” MCHJ tomonidan sotib olingan.
.jpg)
Mazkur hovli 2022-yil fevralida auksion orqali sotuvga chiqarilgan, biroq o‘shanda sotilmagan edi.
Auksionga qo‘yilgan qimmat uylar
2022-yil fevralda Toshkentda MIB tomonidan auksionga qo‘yilgan hovli 2,7 milliard so‘mga sotilgandi. Shuningdek, Toshkentdagi hovli MIB tomonidan 5,2 milliard so‘mga auksionga qo‘yilgani, Nurafshonda 9 qavatli uy 51 milliard so‘m boshlang‘ich narx bilan sotuvga chiqarilgani to‘g‘risida xabar berilgandi. Toshkent shahar Mirzo Ulug‘bek tumani, Suxayl ko‘chasidagi hovli esa 4 milliard so‘m qiymatida kimoshdi savdosiga qo‘yilgan edi.
Izoh (0)