2021-yildan beri Afg‘onistonda BMTning gumanitar masalalarni muvofiqlashtirish boshqarmasining kamida 38 nafar xodimi halok bo‘ldi. Bu haqda BMTning Afg‘oniston bo‘yicha maxsus vakili o‘rinbosari Daniel Piter Endres ma’lum qildi.
Maxsus vakilning TOLOnews’ga aytishicha, halok bo‘lgan xodimlar asosan bolalarni poliomiyelitga qarshi emlash, shuningdek, dalalarni minalardan tozalash bilan shug‘ullangan.
Daniel Piter Endresning qayd etishicha, Afg‘onistonda 29 millionga yaqin odam gumanitar yordamga muhtoj. 2022-yilda, maxsus vakilning so‘zlariga ko‘ra, BMT idorasi Afg‘onistonning 401 tumanidagi 26 million fuqaroga yordam ko‘rsatgan.
Birlashgan Millatlar Tashkilotining Afg‘onistonga yordam ko‘rsatish missiyasi 2002-yil 28-martda tashkil etilgan. Xavfsizlik kengashi muntazam ravishda missiya vakolatini uzaytirib boradi. Oxirgi marta missiya vakolati 2023-yilning martigacha uzaytirilgan. Fuqarolarni qo‘llab-quvvatlash va ularga nisbatan zo‘ravonlikning oldini olish missiyaning asosiy vazifalaridan biri hisoblanadi.
Izoh (0)