2021 йилдан бери Афғонистонда БМТнинг гуманитар масалаларни мувофиқлаштириш бошқармасининг камида 38 нафар ходими ҳалок бўлди. Бу ҳақда БМТнинг Афғонистон бўйича махсус вакили ўринбосари Даниэль Питер Эндрес маълум қилди.
Махсус вакилнинг TOLOnews’га айтишича, ҳалок бўлган ходимлар асосан болаларни полиомиелитга қарши эмлаш, шунингдек, далаларни миналардан тозалаш билан шуғулланган.
Даниэль Питер Эндреснинг қайд этишича, Афғонистонда 29 миллионга яқин одам гуманитар ёрдамга муҳтож. 2022 йилда, махсус вакилнинг сўзларига кўра, БМТ идораси Афғонистоннинг 401 туманидаги 26 миллион фуқарога ёрдам кўрсатган.
Бирлашган Миллатлар Ташкилотининг Афғонистонга ёрдам кўрсатиш миссияси 2002 йил 28 мартда ташкил этилган. Хавфсизлик кенгаши мунтазам равишда миссия ваколатини узайтириб боради. Охирги марта миссия ваколати 2023 йилнинг мартигача узайтирилган. Фуқароларни қўллаб-қувватлаш ва уларга нисбатан зўравонликнинг олдини олиш миссиянинг асосий вазифаларидан бири ҳисобланади.
Изоҳ (0)