Niderlandiyaning 3 ta shahrida portlashlar sodir bo‘ldi

Niderlandiyaning Gaaga, Amsterdam va Vlaardingen shaharlarida qator portlashlar sodir bo‘ldi, deb yozadi NL Times gazetasi politsiyaga tayanib.

Kechasi ro‘y bergan portlashlar natijasida Vlaardingen shahridagi oyoq kiyimlar do‘koni, Amsterdamning Zeydost tumanidagi ikkita uy, Gaagadagi uy va mashinalar zarar ko‘rgan.

Portlash oqibatida hech kim jabr ko‘rmadi. Politsiya ma’lumotlariga ko‘ra, Vlaardingenda portlash mahalliy vaqt bilan 2:30 da do‘kon yonida sodir bo‘lgan, portlash oynalarni sindirib, eshikni shikastlagan. Bundan tashqari, binoning fasadi yonib ketgan.

Amsterdamda ikkita portlash ertalab soat 4:50 va 7:00 atrofida sodir bo‘ldi, portlash oqibatida yuzaga kelgan yong‘inlar tez orada o‘chirilgan.

Gaagada mahalliy vaqt bilan taxminan 1:10 da yaqin atrofdagi uylarda portlovchi qurilma ishga tushdi, shundan so‘ng uy eshigi va uning yonida turgan mashina yonib ketdi.

Hozirda voqea yuzasidan tergov-surishtiruv ishlari olib borilmoqda.