Bayden Kim Chen Inni hech qanday shartlarsiz uchrashishga taklif qilyapti

AQSH prezidenti Jo Bayden Shimoliy Koreya yetakchisi Kim Chen In bilan Koreya yarimorolini yadrosizlantirish masalasini muhokama qilmoqchi. Bu haqda Oq uy Milliy xavfsizlik kengashining strategik kommunikatsiyalar bo‘yicha koordinatori Jon Kirbi ma’lum qildi, deb yozadi Kyodo.

Uning ta’kidlashicha, Bayden hech qanday shartlarsiz Shimoliy Koreya rahbari bilan uchrashishga tayyor.

“Biz hech qanday shartlarsiz, o‘tirib muzokaralar olib borishga tayyormiz”, — dedi Kirbi.

Uning so‘zlariga ko‘ra, Shimoliy Koreya bu taklifga hozircha ijobiy javob bermagan, biroq u hamon amalda.

Kirbi bu haqda Baydenning Yaponiya va Janubiy Koreya yetakchilari bilan uch tomonlama sammiti oldidan ma’lum qildi. Sammitda kun tartibidagi asosiy masala Shimoliy Koreyaning yadro va raketa salohiyatini jadal rivojlantirayotgani bo‘ladi.

Ma’lumot uchun AQSHning avvalgi prezidenti Donald Tramp va KXDR yetakchisi Kim Chen In Shimoliy Koreyani yadrosizlantirish masalasini muhokama qilish uchun uch marta uchrashgan.