Toshkentda ekilayotgan har bir daraxtga pasport beriladi

Toshkentga bugungacha ekilgan va ekilayotgan har bir daraxtga pasport beriladi. Bu haqda poytaxt hokimligi matbuot xizmati xabar berdi.

Ma’lum qilinishicha, 2030-yilgacha Toshkent shahri hududidagi yashil maydonlarni 5 000 gektarga yetkazish maqsad qilingan. Bu borada ishlab chiqilgan chora-tadbirlar rejasiga muvofiq, 2024-yilda hozirda mavjud 900 gektarga qo‘shimcha 300 gektar ko‘kalamzor hudud tashkil etilib, yashil maydonlar 1 100 gektarga, 2025-yilga 1 400, 2026-yilda 1 900, 2027-yilga 2 500, 2028-yilda 3 200, 2029-yilda 4 000 gektarga yetkaziladi.

Shunga parallel ravishda bugungacha ekilgan va ekilayotgan har bir daraxtga pasport berish va ularning parvarishi uchun mas’ullarni biriktirish hamda o‘sish jarayonini nazorat qilish ishlari ham olib boriladi.

Shavkat Mirziyoyev 4-iyul kuni toshkentlik saylovchilar bilan uchrashuv chog‘ida poytaxtda ekologik barqarorlikni ta’minlash, uni toza havoli megapolislardan biriga aylantirish ishlari jadallashtirilishini aytgandi. 

“Bugungi kunda poytaxtimizda yashil maydonlar 900 gektarni tashkil qiladi. Kelgusi yetti yilda bu hududni 5 barobar ko‘paytirib, 5 ming gektarga yetkazamiz”, — degan edi u.

Buning uchun shahar bo‘ylab har yili kamida 1 million dona manzarali, mevali ko‘chatlar va qalamchalar ekilishini qayd etib o‘tgandi.

“Toshkent shahrini 2030-yilga qadar ijtimoiy-iqtisodiy rivojlantirish chora-tadbirlari to‘g‘risida”gi prezident farmonida madaniyat va istirohat bog‘lari, xiyobonlar va bulvarlar qiyofasini o‘zgartirish, yashil hududlarni keskin ko‘paytirish orqali poytaxtni toza havoli megapolislardan biriga aylantirish belgilandi.