O‘zbekiston hududidan tranzit o‘tuvchi xavfli toifaga kiritilgan yuklarga ruxsatnoma berish jarayoni raqamlashtirildi. Bu haqda “Dunyo” agentligi xabar berdi.
Qayd etilishicha, Transport vazirligi tomonidan “Xavfli yuk” axborot tizimi ishlab chiqilgan. Natijada xavfli yuklarni tranzit tashish uchun ruxsatnomalarni berish anʼanaviy ko‘rinishdan elektron shaklga o‘tkazilgan. Endilikda tegishli ruxsatnoma talabgorlari mazkur axborot tizimi orqli ariza yuborishlari mumkin.
Tizim orqali arizachi murojaat yo‘llagandan so‘ng, qonunchilikda belgilangan tartibda va muddatlarda ariza ko‘rib chiqiladi va tegishli xulosalar asosida ruxsatnoma tizim tomonidan taqdim etiladi. Taqdim etilgan ruxsatnoma blankasini tizim orqali onlayn yuklab olish mumkin.
Mazkur “Xavfli yuk” axborot tizimi O‘zbekiston Vazirlar Mahkamasining tegishli qaroriga muvofiq ishlab chiqildi.
Bundan oldin O‘zbekiston, Turkmaniston, Eron davlatlari xalqaro transport va tranzit yo‘lagini tashkil etishni rejalashtirayotgani, O‘zbekistonda avtomobilda xalqaro tashuv uchun ruxsatnoma berish tartibi belgilangani to‘g‘risida xabar berilgandi.
Xorijiy/ko‘p tomonlama ruxsatnomalarni olish uchun arizani milliy tashuvchi o‘zining ERIsi bilan tasdiqlagan holda “E-avto ruxsatnoma” AAT orqali taqdim etadi va ariza olingan kundan 1 ish kunida ko‘rib chiqiladi. Ruxsatnomani berish yoki berishni rad etish “E-avto ruxsatnoma” AATda avtomatik tarzda amalga oshiriladi.
Izoh (0)