Milliy gvardiya harbiy xizmatchisi tomonidan Toshkent shahrida patrul-post xizmati xodimining qonuniy talablariga bo‘ysunmasdan faol qarshilik ko‘rsatgan shaxs qo‘lga olindi. Bu haqda Milliy gvardiya matbuot xizmati xabar berdi.
Qayd etilishicha, Toshkent shahar IIBB patrul-post xizmati xodimi X. 5-avgust kuni Qo‘yliq bozorida spirtli ichimlik isteʼmol qilib, mast holatda skuterda bozor bo‘ylab harakatlanayotgan fuqaroni to‘xtatgan. Fuqaro esa patrul-post xizmati xodimining qonuniy talabiga agressiv munosabatda bo‘lib, yonida bo‘lgan “otvyortka” bilan huquq-tartibot xodimining bel sohasiga urib, voqea joyidan yashiringan.
Qo‘yliq bozori hududida jamoat tartibini taʼminlashga masʼul bo‘lgan Milliy gvardiya harbiy xizmatchisi voqeadan xabar topib, darhol ushbu shaxsni qo‘lga olish choralarini ko‘rgan.
Bir necha daqiqadan so‘ng, Milliy gvardiya harbiy xizmatchisi gumonlanuvchi fuqaroga yetib olib, uni qo‘l jangi uslubi bilan qurolsizlantirgan holda qo‘lga olgan va Bektemir tumanining 4-sonli ichki ishlar bo‘limiga olib borib topshirgan.
Olib borilgan dastlabki surishtiruv davomida ushbu shaxs Samarqand viloyatida tug‘ilgan 47 yoshli fuqaro A.R. ekani, ilgari og‘ir va o‘ta og‘ir jinoyat sodir etgani uchun bir necha bor jinoiy javobgarlikka tortilgani va 2016-yilda ozodlikka chiqqanligi maʼlum bo‘lgan.
Ushbu holat bo‘yicha ichki ishlar organlari tomonidan Jinoyat kodeksining 277-moddasi 3-qismi (bezorilik) bo‘yicha jinoiy ish qo‘zg‘atilgan. Fuqaro A.R. gumonlanuvchi sifatida protsessual tarzda hibsga olingan.
“Jabrlangan xodim hozirda shifoxonada, shifokorlar uning ahvolini qoniqarli deb baholamoqda”, — deyiladi xabarda.
Iyul boshlarida Toshkent viloyati hududida fuqaro IIB xodimlariga pichoq o‘qtalgani tasvirlangan video tarqalgandi. Toshkent viloyati Ichki ishlar bosh boshqarmasining mazkur voqea yuzasidan tushuntirish berishicha, u IIB xodimiga pichoq o‘qtalishidan avval 40 yoshli fuqaroning qorin sohasiga pichoq sanchib, unga tan jarohati yetkazgan.
Izoh (0)