Qashqadaryo viloyatining Qarshi shahrida tibbiyot texnikumi va madaniyat maktabida suvdan noqonuniy foydalanib, davlat manfaatiga 116 million so‘mdan ortiq zarar keltirilgani maʼlum bo‘ldi. Bu haqda “Daryo”ga “Qashqadaryo suv taʼminoti” MCHJ axborot xizmati rahbari Ixtiyor Umarov maʼlum qildi.
Taʼkidlanishicha, 2023-yilning o‘tgan olti oyi mobaynidagi holat “Qashqadaryo suv taʼminoti” MCHJ va Ichimlik suvidan foydalanishni nazorat qilish viloyat hududiy inspeksiyasi hamkorligida o‘rganib chiqilgan.
“Ichimlik suvi tarmoqlariga noqonuniy ulanishlarning oldini olish maqsadida o‘tkazilgan nazorat-reyd tadbirlari davomida jami 30 ta holat bo‘yicha maʼmuriy bayonnoma rasmiylashtirilgan. Bundan tashqari 11 ta holat bo‘yicha rasmiylashtirilgan hujjatlar jinoyat ishi qo‘zg‘atish uchun prokuratura organlariga taqdim etilgan.
Jumladan, Qarshi shahridagi Abu Ali ibn Sino nomidagi jamoat salomatligi texnikumi talabalar turar joyida 1 ta D-25 millimetrlik, 1 ta D-20 millimetrlik quvurlar orqali ichimlik suvi tarmog‘iga noqonuniy ulanib, 79,7 million so‘mlik suvdan yashirincha foydalanib kelinganligi maʼlum bo‘lgan. Qarshi Ixtisoslashtirilgan madaniyat maktabida esa 1 ta D-25 millimetrlik quvur orqali 36,8 million so‘mlik ichimlik suvidan qonunga zid ravishda foydalanib kelingan”, — deydi Ixtiyor Umarov.
Aytilishicha, har ikkala holat bo‘yicha rasmiylashtirilgan hujjatlar qonuniy chora ko‘rish uchun prokuratura organlariga taqdim etilgan va yuqorida nomlari keltirilgan tashkilotlar yetkazilgan zararni ixtiyoriy ravishda qoplab bergan.
“Bundan tashqari ‘Mag‘zon’ mahallasida yashovchi fuqaro B.H. o‘ziga tegishli maishiy xizmat ko‘rsatish shoxobchasida ichimlik suvi tarmog‘iga noqonuniy ulanganligi (zarar miqdori 16,3 million so‘m), ‘Paxtazor’ mahallasida yashovchi A.T.ga tegishli umumiy ovqatlanish shoxobchasida nosoz suv o‘lchash asbobidan foydalanib kelganligi (zarar miqdori 62,6 million so‘m) aniqlangan. Bu holatlar bo‘yicha ham to‘plangan hujjatlar prokuratura organlariga taqdim etilgan”, — deydi mas’ul.
Izoh (0)