Қашқадарё вилоятининг Қарши шаҳрида тиббиёт техникуми ва маданият мактабида сувдан ноқонуний фойдаланиб, давлат манфаатига 116 миллион сўмдан ортиқ зарар келтирилгани маълум бўлди. Бу ҳақда “Дарё”га “Қашқадарё сув таъминоти” МЧЖ ахборот хизмати раҳбари Ихтиёр Умаров маълум қилди.
Таъкидланишича, 2023 йилнинг ўтган олти ойи мобайнидаги ҳолат “Қашқадарё сув таъминоти” МЧЖ ва Ичимлик сувидан фойдаланишни назорат қилиш вилоят ҳудудий инспекцияси ҳамкорлигида ўрганиб чиқилган.
“Ичимлик суви тармоқларига ноқонуний уланишларнинг олдини олиш мақсадида ўтказилган назорат-рейд тадбирлари давомида жами 30 та ҳолат бўйича маъмурий баённома расмийлаштирилган. Бундан ташқари 11 та ҳолат бўйича расмийлаштирилган ҳужжатлар жиноят иши қўзғатиш учун прокуратура органларига тақдим этилган.
Жумладан, Қарши шаҳридаги Абу Али ибн Сино номидаги жамоат саломатлиги техникуми талабалар турар жойида 1 та Д-25 миллиметрлик, 1 та Д-20 миллиметрлик қувурлар орқали ичимлик суви тармоғига ноқонуний уланиб, 79,7 миллион сўмлик сувдан яширинча фойдаланиб келинганлиги маълум бўлган. Қарши Ихтисослаштирилган маданият мактабида эса 1 та Д-25 миллиметрлик қувур орқали 36,8 миллион сўмлик ичимлик сувидан қонунга зид равишда фойдаланиб келинган”, — дейди Ихтиёр Умаров.
Айтилишича, ҳар иккала ҳолат бўйича расмийлаштирилган ҳужжатлар қонуний чора кўриш учун прокуратура органларига тақдим этилган ва юқорида номлари келтирилган ташкилотлар етказилган зарарни ихтиёрий равишда қоплаб берган.
“Бундан ташқари ‘Мағзон’ маҳалласида яшовчи фуқаро Б.Ҳ. ўзига тегишли маиший хизмат кўрсатиш шохобчасида ичимлик суви тармоғига ноқонуний уланганлиги (зарар миқдори 16,3 миллион сўм), ‘Пахтазор’ маҳалласида яшовчи А.Т.га тегишли умумий овқатланиш шохобчасида носоз сув ўлчаш асбобидан фойдаланиб келганлиги (зарар миқдори 62,6 миллион сўм) аниқланган. Бу ҳолатлар бўйича ҳам тўпланган ҳужжатлар прокуратура органларига тақдим этилган”, — дейди масъул.
Изоҳ (0)