Ijtimoiy tarmoqda Andijon viloyatida 21 yoshli ayol o‘zini osib o‘ldirgani haqidagi xabarlar tarqaldi. Oliy sud matbuot xizmati holat yuzasidan tergovga qadar tekshiruv harakatlari olib borilayotganini ma’lum qildi.
Aniqlanishicha, 15-iyul kuni viloyatning Oltinko‘l tumanida yashagan 21 yoshli kelin S.O. o‘z joniga qasd qilgan. Sudga oid tibbiy ekspertizaning dastlabki ma’lumotnomasiga ko‘ra, unda bo‘yin a’zolarini sirtmoq bilan siqilishi natijasida yuzaga kelgan mexanik asfiksiya, o‘pka visseral plevra varaqlari osti va yurak epikard osti sohalariga qon quyilishi, bo‘yin sohasidagi strangulyasion egat shilinma, bosh peshona va chap quloq suprasi atrofida shilinma ko‘rinishidagi jarohatlar mavjudligi ko‘rsatilgan. Shuningdek, mazkur holat yuzasidan sud-psixologiya ekspertizasi tayinlangan.
Marhumaning otasining “Gazeta.uz”ga ma’lum qilishicha, u qizining o‘zini o‘zi o‘ldirganiga ishonmaydi. “Farzandim o‘zini zaxarlashi va jarohat yetkazishiga umuman ishonmayman, bu aqlga sig‘maydigan ma’lumot. Farzandlarimning barchasini irodali qilib tarbiyalaganman. Olti yil davomida farzandsizlik dog‘ida yurib, qizimni tilab olgandim”, — degan qizning otasi.
Uning so‘zlariga ko‘ra, 2020-yilda turmushga chiqqan qizi 2021-yilda o‘g‘il farzand ko‘rgan. Chaqaloq homilaning sakkizinchi oyida, ya’ni muddatidan oldin erta tug‘ilgani sababli uni davolatish paytida xarajatlar ko‘paygan. Shundan keyin qudalar o‘rtasiga sovuqchilik tushishni boshlagan. Qiz qaynonasi va qaynakasidan ko‘p shikoyat qilgan.
Oliy sud matbuot xizmati xabarida keltirilishicha, hozirda tuman prokuraturasi tomonidan tergovga qadar tekshiruv harakatlari olib borilmoqda, natijasi bo‘yicha qonuniy qaror qabul qilinishi ta’minlanadi.
Tergovga qadar tekshiruv jarayonlari viloyat prokuraturasi tomonidan nazoratga olingan.
Izoh (0)