DXX yer maydonlarining noqonuniy sotilishi bilan bog‘liq bir qator holatlarga chek qo‘ydi. Xususan, Jizzaxda shamol elektr stansiyalari qurish uchun yer olib berish evaziga 200 ming dollar talab qilgan qurilish firmasi rahbari ushlangan.
Ma’lum qilinishicha, u tadbirkorlik bilan shug‘ullanmoqchi bo‘lgan fuqaroning ishonchiga kirib, Yangiobod tumani hokimligida ishlovchi mansabdor tanishi yordamida, yopiq shaklda o‘tkaziladigan tender orqali unga mazkur tuman hududidan 200 gektar yer maydonini shamol elektr stansiyalari qurish uchun olib berish evaziga shuncha pul talab qilgan.
DXX xodimlari tomonidan o‘tkazilgan tezkor tadbirda, u so‘ralgan pul mablag‘idan 100 ming AQSH dollarini olgan vaqtida ashyoviy dalillar bilan ushlangan. Jinoyatni to‘liq fosh etish maqsadida, qurilish firmasi rahbaridan olingan dastlabki ko‘rsatmalar hamda mavjud dalillarga asoslanib, uning Yangiobod tumani hokimligida masʼul lavozimda ishlovchi tanishi ham qo‘lga olingan.
Farg‘ona shahridagi masʼuliyati cheklangan jamiyat rahbari va uning 1982-yilda tug‘ilgan tanishi o‘zaro til biriktirib, mazkur MCHJga investitsiya kiritib, ipak matolar tayyorlash va to‘qimachilik mahsulotlari ishlab chiqarish uchun Farg‘ona shahridagi kichik sanoat zonasi hududidan ajratilgan 2 gektar yerni xaridor nomiga rasmiylashtirib berish evaziga 110 ming AQSH dollari talab qilishib, oldindan 50 ming AQSH dollari olgan vaqtlarida DXX va Iqtisodiy jinoyatlarga qarshi kurashish departamenti xodimlari tomonidan ushlangan.
DXXning Toshkent viloyati bo‘yicha boshqarmasi xodimlari tomonidan Bosh prokuratura huzuridagi departamentning hududiy boshqarmasi bilan hamkorlikda o‘tkazilgan tezkor tadbirda, Parkent tumanida dehqonchilik yo‘nalishida faoliyat yurituvchi fermer xo‘jalik rahbarining o‘g‘li mazkur xo‘jalikning 10 gektar yerni xaridorga 50 ming AQSH dollariga sotishga kelishib, oldindan 26 ming AQSH dollari olgan vaqtida ushlangan.
Sirdaryo viloyatida o‘tkazilgan tezkor tadbirda Sardoba tumanidagi fermer xo‘jalik rahbari mazkur xo‘jalikning sabzavot va poliz mahsulotlari yetishtirish uchun mo‘ljallangan 5 gektar yerni xaridorga 18 ming AQSH dollariga sotishga kelishib, 17 900 AQSH dollari va 1 million 150 ming so‘m olgan vaqtida qo‘lga tushgan.
Namangan viloyatida o‘tkazilgan tezkor tadbirda esa Chust tumanidagi paxta va g‘alla yetishtirishga ixtisoslashgan fermer xo‘jalikning rahbari 1976-yilda tug‘ilgan tanishi bilan o‘zaro til biriktirib, mazkur xo‘jalikning 2 gektar yer maydonini mansabdor tanishlari orqali xaridor nomiga rasmiylashtirib berish va u yerda bog‘dorchilik bilan shug‘ullanishga ruxsat olib berish evaziga 11 500 AQSH dollari olgan vaqtlarida ushlangan.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyati ishlari qo‘zg‘atilib, tergov harakatlari olib borilmoqda.
Izoh (0)