ДХХ ер майдонларининг ноқонуний сотилиши билан боғлиқ бир қатор ҳолатларга чек қўйди. Хусусан, Жиззахда шамол электр станциялари қуриш учун ер олиб бериш эвазига 200 минг доллар талаб қилган қурилиш фирмаси раҳбари ушланган.
Маълум қилинишича, у тадбиркорлик билан шуғулланмоқчи бўлган фуқаронинг ишончига кириб, Янгиобод тумани ҳокимлигида ишловчи мансабдор таниши ёрдамида, ёпиқ шаклда ўтказиладиган тендер орқали унга мазкур туман ҳудудидан 200 гектар ер майдонини шамол электр станциялари қуриш учун олиб бериш эвазига шунча пул талаб қилган.
ДХХ ходимлари томонидан ўтказилган тезкор тадбирда, у сўралган пул маблағидан 100 минг АҚШ долларини олган вақтида ашёвий далиллар билан ушланган. Жиноятни тўлиқ фош этиш мақсадида, қурилиш фирмаси раҳбаридан олинган дастлабки кўрсатмалар ҳамда мавжуд далилларга асосланиб, унинг Янгиобод тумани ҳокимлигида масъул лавозимда ишловчи таниши ҳам қўлга олинган.
Фарғона шаҳридаги масъулияти чекланган жамият раҳбари ва унинг 1982 йилда туғилган таниши ўзаро тил бириктириб, мазкур МЧЖга инвестиция киритиб, ипак матолар тайёрлаш ва тўқимачилик маҳсулотлари ишлаб чиқариш учун Фарғона шаҳридаги кичик саноат зонаси ҳудудидан ажратилган 2 гектар ерни харидор номига расмийлаштириб бериш эвазига 110 минг АҚШ доллари талаб қилишиб, олдиндан 50 минг АҚШ доллари олган вақтларида ДХХ ва Иқтисодий жиноятларга қарши курашиш департаменти ходимлари томонидан ушланган.
ДХХнинг Тошкент вилояти бўйича бошқармаси ходимлари томонидан Бош прокуратура ҳузуридаги департаментнинг ҳудудий бошқармаси билан ҳамкорликда ўтказилган тезкор тадбирда, Паркент туманида деҳқончилик йўналишида фаолият юритувчи фермер хўжалик раҳбарининг ўғли мазкур хўжаликнинг 10 гектар ерни харидорга 50 минг АҚШ долларига сотишга келишиб, олдиндан 26 минг АҚШ доллари олган вақтида ушланган.
Сирдарё вилоятида ўтказилган тезкор тадбирда Сардоба туманидаги фермер хўжалик раҳбари мазкур хўжаликнинг сабзавот ва полиз маҳсулотлари етиштириш учун мўлжалланган 5 гектар ерни харидорга 18 минг АҚШ долларига сотишга келишиб, 17 900 АҚШ доллари ва 1 миллион 150 минг сўм олган вақтида қўлга тушган.
Наманган вилоятида ўтказилган тезкор тадбирда эса Чуст туманидаги пахта ва ғалла етиштиришга ихтисослашган фермер хўжаликнинг раҳбари 1976 йилда туғилган таниши билан ўзаро тил бириктириб, мазкур хўжаликнинг 2 гектар ер майдонини мансабдор танишлари орқали харидор номига расмийлаштириб бериш ва у ерда боғдорчилик билан шуғулланишга рухсат олиб бериш эвазига 11 500 АҚШ доллари олган вақтларида ушланган.
Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жинояти ишлари қўзғатилиб, тергов ҳаракатлари олиб борилмоқда.
Изоҳ (0)