“O‘zbekiston milliy elektr tarmoqlari” 2022-yilni 4,34 trln so‘m zarar bilan yakunlagani sababini ma’lum qildi

O‘zbekistonda 2022-yilda eng ko‘p foyda ko‘rgan va eng ko‘p zarar ko‘rgan davlat ishtirokidagi korxonalar ro‘yxati e’lon qilingandi. Unda “O‘zbekiston milliy elektr tarmoqlari” yilni 4,34 trillion so‘m zarar bilan yakunlagani qayd etilgandi. Aksiyadorlik jamiyati buning sabablaridan birini ma’lum qildi.

Qayd etilishicha, aksiyadorlik jamiyatining moliyaviy faoliyati bo‘yicha asosiy daromadi — elektr energiyasini yagona xaridi va sotishidan shakllanadi. Yaʼni, hisobot bo‘yicha asosiy zararni mahsulot (tovar, ish va xizmat)larni sotish hajmiga muvofiq tarzda, 2022-yildagi faoliyat yakuniga ko‘ra yalpi zarar 4,34 trillion so‘mni tashkil etgan.

“O‘zbekiston milliy elektr tarmoqlari” AJ zarar bilan ishlashiga asosiy sabab, Vazirlar Mahkamasi huzuridagi Idoralararo tarif komissiyasining 7-, 10- va 12-sonli bayonlari bilan tasdiqlangan tarmoq ichki tariflariga asosan, elektr energiyasini sotib olish (o‘rtacha 388,1 so‘m) va sotish (o‘rtacha 348,8 so‘m) narxlari orasidagi manfiy tafovut natijasida har bir kVt/soatdan 39,3 so‘m zarar evaziga hududiy elektr tarmoqlari korxonalariga yetkazib bergani tufayli edi.

“Yaʼni aksiyadorlik jamiyati elektr energiyasi qimmat xarid qilinib, arzon sotilgani uchun zarar ko‘rgan”, — deyiladi “O‘zbekiston milliy elektr tarmoqlari” matbuot xizmati izohida.

Misol tariqasida 2023-yilning 1-choragida elektr energiyasini ishlab chiqaruvchi korxonalardan jami 18,6 mlrd kVt/soat elektr energiyasi o‘rtacha QQS bilan 426,2 so‘mdan xarid qilinib, Hududiy elektr tarmoq korxonalariga 18,8 mlrd kVt/soat hajmda o‘rtacha 405,4 so‘mdan sotilgani, yaʼni har bir kVt/soatdan 20,8 so‘mdan zarar ko‘rilgani keltirib o‘tilgan.

Xabarda aytilishicha, “O‘zbekiston milliy elektr tarmoqlari” AJ 2023-yil uchun tasdiqlangan Biznes rejasida ham joriy yildagi faoliyati zarar bilan yakunlanishi nazarda tutilgan.