Yunusobod tumani hokimligi liftda qamalib qolgan ikki fuqaroga liftni ishlab chiqargan kompaniya shartnoma yo‘qligi sabab bepul xizmat ko‘rsatmasligini aytgani yuzasidan tarqalgan xabarlarga rasmiy munosabat bildirdi.
Ijtimoiy tarmoqlarda ikki kishi bo‘lgan lift ochilmay qolgani yuzasidan xabar tarqaldi. Ushbu holat Yunusobod tumani hokimligi va huquqni muhofaza qilish organlari mas’ullari tomonidan joyiga chiqib o‘rganilgan.
Aniqlanishicha, 7-avgust kuni soat 17:14 da tumandagi 5-markaz, 74-uyning liftida 2 nafar fuqaro borligida ochilmay qolgan. Ular dastlab, ushbu liftni ishlab chiqargan kompaniyaga telefon qilgan. Shu ondayoq kompaniya masʼullari liftga xizmat ko‘rsatmasligini bildirgan. Shundan so‘ng, ular Toshkent shahar FVB bo‘limi markaziy dispetcherlik markaziga aloqaga chiqqan. Oradan besh daqiqa o‘tmasdan fuqarolar liftdan chiqarilgan. Ular tuman FVB xodimlariga o‘z minnatdorchiligini bildirgan.
Qayd etilishicha, mazkur lift “Texnopark” MCHJ tomonidan “Osten” brendi ostida ishlab chiqilgan bo‘lib, olti oygacha sinov muddati belgilangan. Lift uyga 15 kun avval o‘rnatilgan bo‘lib, hozirgi kunda sinov muddatini o‘tayotgani sababli xizmat ko‘rsatuvchi boshqaruv servis kompaniyasiga topshirilmagan.
“Lift Boshqaruv servis kompaniyasiga topshirilganidan so‘ng xizmat ko‘rsatish bo‘yicha BSK bilan shartnoma imzolanadi. O‘rnatilgan har bir liftning kirish peshtoqiga xizmat ko‘rsatuvchi va qutqaruv xizmati telefon raqamlari yozib qo‘yilganligi maʼlum bo‘ldi”, — deyiladi munosabatda.
Liftda qamalib vafot etgan ayol voqeasi
Avvalroq Toshkent shahri Mirzo Ulug‘bek tumanida 32 yoshli ayol liftda qamalib, vafot etgani xabar qilingandi. Ayol 24-iyul kuni soat taxminan 14:50 larda ko‘p qavatli uyning liftiga kirib, qaytib chiqmagan. 26-iyul kuni marhumaning yaqin qarindoshlari tomonidan ichki ishlar idorasiga bedarak yo‘qolganligi yuzasidan xabar berilgan, 27-iyul kuni esa uning jasadi lift ichidan topilgan. Marhuma 4 kun davomida lift ichida qolib ketgan.
Ijtimoiy tarmoqlarda tarqalgan xabarlarda odam o‘limi bilan yakunlangan ushbu ko‘ngilsizlikka elektr energiyasi ta’minotidagi doimiy uzilishlar sabab qilib ko‘rsatilgandi. Tekshirish davomida ushbu lift bir necha kundan buyon ishlamayotgani, oldin ham ishlamay qolish holatlari ko‘p marotaba bo‘lgani haqida uy yashovchilari tomonidan tushuntirishlar berilgan. Shuningdek, voqea joyida xolis surishtiruv olib borgan OAV vakillari, jumladan, “Daryo” muxbirining videoreportajlarida ham o‘z tasdig‘ini topgan.
Izoh (0)