Surxondaryo va Sirdaryo viloyatlarida yer maydoni savdosi bilan bog‘liq firibgarlik holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Sho‘rchi tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda Sh.R. ismli shaxs “Yalti” MFYdagi “M.” fermer xo‘jaligiga qarashli 50 sotix yer maydonini fuqaro T.X.ga 45 ming AQSH dollariga sotishini aytib, oldindan 40 ming dollarni olgan vaqtida ashyoviy dalillar bilan ushlangan.
Departamentning Boyovut tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda esa tuman Qishloq xo‘jaligi bo‘limi bosh mutaxassisi Sh.Sh. fuqaro U.X. bilan o‘zaro til biriktirib, fuqaro U.T.ga tanishlari yordamida 10 ming AQSH dollari evaziga “Navbahor” MFY hududidagi 16 gektar yer maydonini auksion savdolari orqali yutib olib berishini aytib, oldindan 2 ming dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Noqonuniy yer savdolari
Bir necha kun oldin Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi. Aprel boshlarida esa Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgandi.
Izoh (0)