Сурхондарё ва Сирдарё вилоятларида ер майдони савдоси билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Шўрчи туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда Ш.Р. исмли шахс “Ялти” МФЙдаги “М.” фермер хўжалигига қарашли 50 сотих ер майдонини фуқаро Т.Х.га 45 минг АҚШ долларига сотишини айтиб, олдиндан 40 минг долларни олган вақтида ашёвий далиллар билан ушланган.
Департаментнинг Боёвут туман бўлими томонидан ДХХ ходимлари билан ҳамкорликда ўтказилган тезкор тадбирда эса туман Қишлоқ хўжалиги бўлими бош мутахассиси Ш.Ш. фуқаро У.Х. билан ўзаро тил бириктириб, фуқаро У.Т.га танишлари ёрдамида 10 минг АҚШ доллари эвазига “Навбаҳор” МФЙ ҳудудидаги 16 гектар ер майдонини аукцион савдолари орқали ютиб олиб беришини айтиб, олдиндан 2 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ер савдолари
Бир неча кун олдин Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)