Toshkent viloyatida bir qizni zo‘rlaganlikda gumon qilingan Milliy gvardiya Qo‘riqlash bosh boshqarmasi xodimiga nisbatan jinoyat ishi qo‘zg‘atilgani haqida xabar berilgan edi. Oliy sudning ma’lum qilishicha, mazkur jinoyat ishi sudning ish yurituviga kelib tushgan.
Unga ko‘ra, Jinoyat kodeksining 118-moddasi (nomusga tegish) 4-qismi (o‘n to‘rt yoshga to‘lmagan shaxsning nomusiga tegish) bilan ayblangan SH.SH.ga (1993-yilda Toshkent viloyatida tug‘ilgan, Qibray tumani Qo‘riqlash bo‘limi safdor xodimi, jinoyat sodir etilgan paytda ishsiz bo‘lgan, jinoyat ishlari bo‘yicha Nurafshon shahar sudining 2023-yil 29-iyuldagi ajrimi bilan qamoqqa olish tarzidagi ehtiyot chorasi qo‘llangan) oid jinoyat ishi bugun jinoyat ishlari bo‘yicha Bo‘stonliq tuman sudining ish yurituviga kelib tushdi.
Qayd etilishicha, Jinoyat kodeksining 118-moddasida nazarda tutilgan jinoyatlar bilan bog‘liq jinoyat ishlari Jinoyat-protsessual kodeksining 19-moddasi (sudda jinoyat ishlarining oshkora ko‘rilishi) talablariga muvofiq yopiq sud majlisida ko‘riladi.
Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi. Avvalroq ushbu holat yuzasidan munosabat bildirgan Prezident administratsiyasi sho‘ba mudiri Saida Mirziyoyeva qonunchilikda jiddiy muammolar borligi va ushbu bo‘shliqdan jirkanch shaxslar foydalanib qolayotganini alohida qayd etib, Bosh prokuraturadan mazkur holatga alohida e’tibor qaratib, sinchiklab o‘rganishni va huquqiy baho berishni so‘ragandi.
Prezident administratsiyasi rahbari o‘rinbosari Komil Allamjonov pedofillarga nisbatan kimyoviy kastratsiya jazosini qo‘llash yuzasidan qonunchilikka o‘zgartirish kiritish vaqti kelganini aytgandi. Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozitsiyada.
Izoh (0)